अनामिका आणि सौरभच्या लग्नात येणार विघ्न.. या प्रसिद्ध अभिनेत्याची मालिकेत एन्ट्री

झी मराठी वाहिनीवरील तू तेव्हा तशी ही मालिका लवकरच एका रंजक वळणावर येऊन ठेपली आहे. मालिकेत सौरभ पटवर्धन आणि अनामिका दीक्षित यांच्या लग्नाची लगबग सुरू झाली आहे. मात्र या लगबगीत आता एक धक्कादायक ट्विस्ट आलेला पाहायला मिळणार आहे. हा धक्कादायक ट्विस्ट म्हणजेच अनामीकाचा पहिला नवरा आकाश जोशी या मालिकेत दाखल होत आहे. त्यामुळे अनामिका आणि सौरभचे लग्न होणार की नाही असा मोठा प्रश्न मालिकेच्या प्रेक्षकांना पडला आहे. नुकताच तू तेव्हा तशी मालिकेचा प्रोमो प्रेक्षकांच्या भेटीला आला आहे. या प्रोमोमध्ये लग्नाची पत्रिका बनवत असताना सौरभच्या घरी आकाशची एन्ट्री होते.

अनामीकाचा पहिला नवरा तिला तिच्या मुलीला आणि आईला सोडून निघून गेलेला असतो. त्यामुळे राधाची आणि सासूची जबाबदारी अनामीकाने तिच्या खांद्यावर समर्थपणे सांभाळली होती. अशा परिस्थितीत आता सौरभ बरोबर लग्न करण्याच्या तयारीत असतानाच आकाशची एन्ट्री झाल्याने मालिकेला मोठे वळण मिळाले आहे. मालिकेत अकाशच्या भूमिकेत प्रसिद्ध अभिनेता अशोक समर्थ झळकणार आहे. या भूमिकेसाठी तेवढ्याच दमदार अभिनेत्याची एन्ट्री होणे गरजेचे होते त्यामुळे ही भूमिका अशोक समर्थ नावाप्रमाणेच समर्थपणे सांभाळणार याची खात्री आहे. स्वप्नील जोशी, शिल्पा तुळसकर यांच्या भूमिकेस तोडीस तोड ही भूमिका असल्याने तेवढ्याच दमदार नायकाची या भूमिकेसाठी आवश्यकता होती.

सिंघम चित्रपटातील शिवाच्या भूमिकेने अशोक समर्थ यांना मोठी लोकप्रियता मिळाली. बार्डो, वीर, आर राजकुमार, रावडी राठोड, पोलिसाची बायको, थोडं तुझं थोडं माझं, दगडी चाळ २ अशा अनेक हिंदी मराठी चित्रपटातून त्यांनी महत्त्वपूर्ण भूमिका साकारल्या आहेत. अशोक समर्थ आणि पत्नी शीतल पाठक जननी या चित्रपटातून दिग्दर्शन क्षेत्रात पाऊल टाकत आहेत. दगडी चाळ २ चित्रपटाला प्रेक्षकांकडून खूप चांगला प्रतिसाद मिळत आहे. यात अशोक समर्थ यांनी शकिलची दमदार भूमिका साकारली आहे. आता तू तेव्हा तशी मालिकेतून त्यांनी छोट्या पडद्यावर पुन्हा एकदा एन्ट्री केली आहे. आकाशच्या येण्याने अनामिका आणि सौरभच्या लग्नात मात्र नक्कीच विघ्न येणार आहे. या दमदार भूमिकेसाठी अशोक सर्मथ यांना मनःपूर्वक शुभेच्छा.