मराठी बिग बॉसनंतर तू कुठल्या चित्रपटात का दिसला नाहीस..

मराठी बिग बॉसचा दुसरा सिजन शिव ठाकरे ने जिंकला होता. शिव ठाकरे हे नाव या शोमुळे प्रेक्षकांच्या घराघरात पोहोचले होते. अनेकदा बिग बॉसचा शो जिंकल्यानंतर कलाकाराला नवीन संधी चालून येतात. मात्र शिव ठाकरे कोणत्याच चित्रपटात पाहायला मिळाला नसल्याने त्याला एका मुलाखतीत हा प्रश्न विचारला गेला. हिंदी बिग बॉसच्या शोमध्ये शिव ठाकरेने लोकांच्या मनात जागा बनवली होती. याचा फायदा त्याला आता खतरों के खिलाडी या रिऍलिटी शोमध्ये होणार आहे. हिंदी बिग बॉसचा शो जिंकला नसला तरी शिवकडे आता नवनवीन प्रोजेक्ट चालून आले आहेत. सलमान खान सोबत हिंदी चित्रपटात शिव झळकणार असेही बोलले जात आहे.

मराठी चित्रपटात तू कधीच का दिसला नाही यावर मात्र त्याने मौन सोडलं आहे. शिव ठाकरे हा विदर्भातला तरुण. बालपण अतिशय कष्टात काढलेल्या शिवने एम टीव्ही रोडीजमधून मोठी प्रसिद्धी मिळवली होती. पान विकणाऱ्याचा मुलगा रोडीजमध्ये जाऊन आपलं नाव गाजवतो याची दखल रनविजयने देखील घेतली होती. शिवचा प्रवास रनविजयने खूप जवळून अनुभवला असल्याने हिंदी बिग बॉसच्या घरात असताना खास पाठिंबा दर्शवला होता. आपला मित्र एमसी स्टॅन हिंदी बिग बॉसचा विजेता झाला. हे कळल्यावर शिवने खेद व्यक्त न करता एमसीच्या आनंदात सहभागी झाला होता. त्याच्या या कृतीमुळे अनेकांची मनं त्याने जिंकली होती. बिग बॉसशोचा तो रनरअप ठरला, मात्र आता लवकरच शिव नवीन प्रोजेक्ट मधून प्रेक्षकांच्या भेटीला येत आहे.

मराठी बिग बॉसचा शो जिंकल्यानंतरही शिवकडे नवीन चित्रपट चालून आले होते. एका चित्रपटासाठी त्याला काम देखील मिळाले होते. मात्र चित्रपट काही कारणास्तव रखडला गेला आणि कालांतराने हा चित्रपट रद्दच झाला. माझ्याकडे अशा अनेक संधी आल्या मात्र तोंडाशी आलेला घास असा हिरावून जात होता. मधल्या काळात अनेकांनी संधी देऊ केल्या, पण त्यादृष्टीने योग्य पाऊल पुढे येत नव्हते. हा सगळा नशिबाचा भाग आहे. या गोष्टींमुळे मी अजिबात खचलो नाही पण हो, आता लवकरच मी मोठ्या पडद्यावर झळकणार आहे असे त्याने जाहीर केले आहे. त्यामुळे शिवचा हा नवीन चित्रपट कोणता असेल आणि त्याला कोणती भूमिका असेल याची उत्सुकता चाहत्यांना लागून राहिली आहे. शिवला चालून आलेल्या या संधीचे नक्की सोने करेल अशी आशा वाटते.