माझी तुझी रेशीमगाठ मालिकेतील परीचा वाढदिवस.. कलाकारांनी दिल्या शुभेच्छा

माझी तुझी रेशीमगाठ या मालिकेतून प्रेक्षकांची मने जिंकून घेतलेली परी म्हणजेच सर्वांची लाडकी मायरा वायकुळ हिचा आज वाढदिवस आहे. मायराच्या वाढदिवसाच्या दिवशी मालिकेतील कलाकारांनी तिला भरभरून शुभेच्छा दिल्या आहेत. संकर्षण कऱ्हाडेने मायराला बॉस काकाकडून शुभेच्छा असे कॅप्शन देऊन तिच्यासोबत माजमस्ती करतानाचे फोटो शेअर केले आहेत. तर मालिकेतील तिची आई नेहा म्हणजेच अभिनेत्री प्रार्थना बेहरेने एक क्युटसा व्हिडीओ शेअर करत तिला शुभेच्छा दिल्या आहेत. मायराचे अनेक व्हिडीओ सोशल मीडियावर पाहायला मिळतील. त्यातला तिचा निरागसपणा प्रेक्षकांना नेहमीच भावला आहे.

मालिकेतील सहकलाकारां सोबतची मजा मस्ती असो वा त्यांची केलेली नक्कल प्रेक्षकांना प्रचंड आवडली आहे. काही दिवसांपूर्वीच मायराने सिम्मी काकूंची नक्कल केली होती. आपल्या केसांना उडवत ती सिम्मी काकूंसारखी पपाss..पपाss म्हणताना खूपच क्युट दिसत होती. तिचा हा व्हिडीओ मालिकेतील कलाकारांनी फावल्या वेळात मोबाईलवर शूट केला होता. त्यानंतर हा व्हिडीओ सोशल मीडियावर मोठ्या प्रमाणावर प्रसिद्धी मिळवताना दिसला होता. अनेकांनी तिच्या या गोड हावभावावरूनच सिम्मी काकूंची नक्कल करत असल्याचे ओळखले होते. त्यामुळे मायरा आता एक्सप्रेशन क्वीन म्हणूनही ओळख मिळवू लागली आहे. इतक्या कमी वयात तिच्या बोलण्यातील लयबद्धता आणि चेहऱ्यावरील हावभाव प्रेक्षकांना एका जागी खिळवून ठेवण्यात यशस्वी ठरलेला पाहायला मिळतो.

आणि म्हणूनच तिचा मालिकेतला सिन कधी पाहायला मिळणार याची प्रेक्षक आतुरतेने वाट पाहताना दिसतात. मायराचा सिन व्यवस्थित व्हावा म्हणून मालिकेतील कलाकार तिच्यासमोर नेहमीच मजामस्तीचे वातावरण तयार करत असतात. स्क्रिप्ट वाचता न येणाऱ्या मायराला तिचा प्रत्येक सिन समजावून सांगावा लागतो. आणि तो तिच्यासमोर करूनही दाखवला जातो. यात तिला श्रेयस तळपदे आणि प्रार्थनाची मदत नेहमीच मिळत असते. त्यामुळे अशा हलक्या फुलक्या वातावरणात मायराचा सिनही तसाच प्रभावी बनतो. मायरा वायकुळ म्हणजेच लाडक्या परीला कलाकार टीम तर्फे वाढदिवसाच्या खूप खूप शुभेच्छा.