माझं नाव कोणत्याही व्यक्तीसोबत जोडू नका.. विशाल निकमचे मीडियाला आवाहन

बिग बॉसच्या घरात असताना विशाल निकमने आपल्या आईला भेटल्यावर त्याच्या गर्लफ्रेंडचे नाव घेऊन ‘तू सौंदर्याला फोन कर’ असे म्हटले होते. तेव्हापासून विशाल निकमची सौंदर्या नक्की आहे तरी कोण? याबाबत चर्चा रंगलेली पाहायला मिळाली होती. अगदी बिग बॉसच्या घरात मीडियाला आमंत्रित करण्यात आले होते. त्यावेळी देखील मीडियाच्या माध्यमातून काही रिपोर्टर्सनि त्याला सौंदर्या बद्दल विचारले होते. त्यावेळी योग्य वेळी मी तिला तुमच्यासमोर आणेल आणि तुम्हाला लग्नाला देखील बोलवू असे विशालने म्हटले होते.

विशाल निकम बिग बॉसच्या तिसऱ्या सीजनचा विजेता झाला. सांगलीतील त्याच्या गावी त्याचे जल्लोषात स्वागत देखील केले, मात्र सौंदर्या नक्की कोण आहे याबाबत त्याने सांगण्याचे टाळले. सौंदर्याचा मी लवकरच खुलासा करेन, पण अगोदर आमच्यात काही गोष्टी खटकल्या होत्या. तेव्हा तिची मी अगोदर भेट घेणार आहे, तिचं मन जिंकणार आहे. मी विजेता झालो त्यावेळी तिने मेसेजकरून माझं अभिनंदनही केलं आहे. योग्य वेळ आली की मी तिला नक्कीच तुमच्यासमोर आणणार आहे, असे विशाल म्हणाला. असे असले तरी विशालने सौंदर्या बाबत कुठलाही खुलासा केला नाही. मात्र मीडिया माध्यमातून ही सौंदर्या कोण आहे याबाबत चर्चा सुरू झाल्या.

विशालची सौंदर्या दुसरी तिसरी कोणी नसून साता जल्माच्या गाठी या त्याच्या मालिकेतील नायिका अक्षया हिंदळकर हिच आहे असे म्हटले आहे. मात्र असे अभिनेत्रीचे नाव आपल्यासोबत जोडले जात असल्याचे पाहून, विशालने आपल्या चाहत्यांना आणि मीडियाला देखील एक नम्र विनंती केली आहे. “मी यापूर्वी सांगितल्याप्रमाणे, योग्य वेळ आल्यावर आणि काही खाजगी गोष्टी सुरळीत झाल्यावर स्वतःहून सौंदर्याचं नाव सांगेल. ती एक सामान्य मुलगी असून, अभिनय सृष्टीशी तिचा काही एक संबंध नाही, त्यामुळे इंडस्ट्रीतील कोणत्याही व्यक्तीसोबत माझं नाव कृपया जुळवू नका! कारण यामुळे विनाकारण त्या व्यक्तीला त्रास होऊ शकतो हे लक्षात घ्या. आणि प्लिज धीर धरा, मला थोडं वेळ द्या.” असे म्हणत विशालने सर्वांना एक विनंती केली आहे. 

दरम्यान काही माध्यमातून विशाल निकमची सौंदर्या ही सोनाली पाटीलच आहे असे म्हटले होते. मात्र त्याने मुद्दामहून सौंदर्याच्या नावाचा उल्लेख केला असे वक्तव्य करण्यात आले. मात्र ह्या गोष्टींमुळे आता विशाल निकम पुरता त्रस्त झाला आहे. सौंदर्याचे नाव घेऊन आपण मोठी चूक केली का, असेही तो विकास सोबत बोलताना म्हणाला होता. मात्र हे प्रकरण आता दिवसेंदिवस वाढत चालले असून त्याच्या नावासोबत इतर अभिनेत्रीची नावं देखील जोडण्यात येऊ लागली असल्याने त्या सर्वांना नाहक त्रास सहन करावा लागतो आहे. आता सौंदर्याचा खुलासा विशाल करेपर्यंत चाहत्यांना भावनांना आवर घालावा लागणार आहे हे मात्र नक्की.