बिग बॉसचा शो जिंकल्यानंतर विशाल निकमची मालिकेतून धमाकेदार एन्ट्री

विशाल निकम हा मराठी बिग बॉसच्या तिसऱ्या सिजनचा विजेता ठरला. बिग बॉसच्या शोमुळे विशाल निकम लोकप्रियतेच्या शिखरावर पोहोचला होता त्याची ही लोकप्रियता प्रेक्षकांच्या मनात आताही कायम टिकून आहे. नुकतेच विशालने गाडी खरेदी केलेली पाहायला मिळाली. शूटिंगसाठी अनेकदा आपण बाईकने, लोकल ट्रेनने प्रवास केला या प्रवासात आता लांबचा पल्ला गाठायचा असेल तर हाताशी गाडी हवी या हेतूने त्याने ही चार चाकी गाडीची खरेदी करत आपला आनंद व्यक्त केलेला पाहायला मिळाला. बिग बॉसच्या शोनंतर विशाल निकम मोठ्या प्रोजेक्टमधून प्रेक्षकांच्या भेटीला यावा अशी त्याच्या चाहत्यांची ईच्छा आहे. त्यांची हीच ईच्छा आता लवकरच पूर्ण होताना दिसणार आहे.

बिग बॉसच्या घरातून बाहेर पडल्यानंतर उत्कर्ष शिंदे, जय दुधाने आणि मीरा जगन्नाथ यांनी म्युजिक व्हिडिओतून काम केलेले पाहायला मिळाले. त्यामुळे विशालने देखील लवकरच एका प्रोजेक्टमधून समोर यावे अशी अपेक्षा होती. कलर्स मराठी वाहिनीने त्याला ही संधी देऊ केलेली पाहायला मिळत आहे. आई मायेचं कवच या मालिकेतून विशाल निकम धमाकेदार एन्ट्री घेताना दिसणार आहे. या मालिकेत तो मानसींगच्या डॅशिंग भूमिकेत पाहायला मिळणार असून सेटवरचा त्याचा बॉक्सिंग करतानाचा लूक एका व्हिडिओतून प्रेक्षकांच्या भेटीला आला आहे. आई मायेचं कवच या मालिकेत भार्गवी चिरमुले आणि अनुष्का पिंपुटकर माय लेकीच्या भूमिकेत दिसत आहेत.

तेजस डोंगरे, सचिन देशपांडे, वरद चव्हाण, वर्षा राणी पटेल, विजय गोखले यांच्या देखील या मालिकेत महत्वाच्या भूमिका आहेत. वाईट मार्ग निवडलेल्या सुहानीचा शोध घेण्यासाठी आई काय काय करू शकते हे या मालिकेतून दाखवण्याचा प्रयत्न केला आहे. सुहानी पर्यंत पोहोचण्यासाठी तिची आई मीनाक्षी सायलीची मदत घेताना दिसत आहे. विशालच्या एंट्रीमुळे या मालिकेची उत्कंठा आता अधिक वाढलेली पाहायला मिळत आहे. आई मायेचं कवच या मालिकेत मानसिंगच्या एन्ट्रीमुळे मिनाक्षीला त्याची मदत होणार का हे पाहणे औत्सुक्याचे ठरणार आहे. मानसींगची भूमिका विरोधी असणार की सकारात्मक असणार हे येत्या काही दिवसातच स्पष्ट होईल. तूर्तास या नव्या आणि तितक्याच दमदार भूमिकेसाठी विशाल निकमचे अभिनंदन.