अनामिका आणि सौरभ प्रेक्षकांना देणार सरप्राईज.. तू तेव्हा तशी मालिकेत अनपेक्षित ट्विस्ट

झी मराठीवरील तू तेव्हा तशी या मालिकेत लवकरच एक आश्चर्यकारक ट्विस्ट पाहायला मिळणार आहे. मालिकेत अनामिका आणि पट्याच्या प्रेमकहाणी सोबत नील आणि राधाची प्रेमकहाणी देखील प्रेक्षकांच्या पसंतीस उतरली आहे. अनामिका सौरभ लग्न कधी करणार याकडे मालिकेच्या चाहत्यांचे लक्ष्य लागून राहिले असतानाच मालिकेत अचानकपणे आश्चर्यकारक घडामोडी घडताना दिसणार आहेत. नुकतेच एका गाण्यासाठी मालिकेच्या कलाकारांनी नटूनथटून सेटवर हजेरी लावली. यावेळी मालिकेत एक गाणं दाखवले जाणार आहे ज्यात सर्व कलाकार सजून गाण्यावर ठेका धरताना दिसणार आहे. या गाण्याचे शूटिंग आज पूर्ण झाले असून या मालिकेचा महाएपिसोड टेलिकास्ट केला जाणार आहे.

मात्र मालिकेतला हा सोहळा नेमका कशासाठी हे अजूनही गुलदस्त्यात ठेवलेले पाहायला मिळत आहे. प्रेक्षक ज्या क्षणाची आतुरतेने वाट पाहत होते तो क्षण म्हणजे अनामिका आणि सौरभचे लग्न. हा सोहळा लवकरच मालिकेतून पाहायला मिळणार असल्याने महा एपिसोडची उत्सुकता अधिक वाढली आहे. या गाण्यासाठी वल्ली आणि अनामिका देखील एकत्र आल्या आहेत. सोबतच चंदू चिमणा चिमणीचीही जोडी गाण्यात झळकणार आहे. मालिकेत अनामीकाच्या आईची म्हणजेच कावेरी आईची एन्ट्री झाली तेव्हापासून या मालिकेवर प्रेक्षक नाराज झाले होते. सुरळीत चाललेले मालिकेचे कथानक अचानक कोणाच्या येण्याने थांबते त्यावेळी हे पात्र कशासाठी? असा प्रश्न आपोआप पुढे येतो.

कावेरी आईची भूमिका रमा नाडगौडा यांनी साकारलेली पाहायला मिळाली. अर्थात भूमिका विरोधी असल्याने प्रेक्षकांनी या भूमिकेवर रोष व्यक्त केला होता. आता कावेरी आई अनामीकाच्या मनातलं ओळखायला किती वेळ घेणार याचीच प्रेक्षक वाट पाहत होते. मात्र आता तो क्षण लवकरच समोर येऊन ठेपला आहे. हा रंजक ट्विस्ट येत्या महा एपिसोडच्या भागात पाहायला मिळणार आहे. मालिकेच्या विशेष भागाचे चित्रीकरण आज पार पडले. यावेळी अभिज्ञा भावे, शिल्पा तुळसकर यांनी नऊवारी साडी नेसली होती. मालिकेच्या कलाकारांनी सेटवर धमालमस्ती केली. या एपिसोड मधून अनामिका सौरभ प्रेक्षकांना एक सरप्राईज देणार आहेत. हे सरप्राईज काय असेल याची उत्सुकता निर्माण झाली आहे.