झी मराठी वाहिनीवर दाखल होणार नवी मालिका.. ही मालिका घेणार लवकरच प्रेक्षकांचा निरोप

झी मराठी वाहिनीवर लवकरच एक नवी मालिका दाखल होत आहे. “तू तेव्हा तशी” या मालिकेत अभिनेता स्वप्नील जोशी मुख्य भूमिकेत झळकणार आहे. स्वप्नील जोशी सध्या झी मराठीवरील चला हवा येऊ द्या या शोमध्ये दिसत आहे. या शोनंतर स्वप्नील मालिकेतून छोट्या पडद्यावर प्रेक्षकांच्या भेटीला येत आहे. स्वप्नील जोशी सोबत अभिनेत्री शिल्पा तुळसकर स्क्रीन शेअर करणार आहे. मालिकेचा पहिला प्रोमो नुकताच प्रेक्षकांसमोर आला असून स्वप्नील आणि शिल्पा समोरून जात असताना कोणीतरी ओळखीचे असल्याचा भास होऊन एकमेकांकडे पाहताना दिसतात. यावेळी दोघांनीही मास्क घातला असल्याने त्यांचे चेहरे एकमेकांना ओळखता आले नसले तरी त्यांच्यात कुठलीतरी जाणीव झालेली पाहायला मिळाली.

ही मालिका सोनी मराठीवरील अजूनही बरसात आहे या मालिकेशी मिळती जुळती वाटत आहे. बऱ्याच कालावधीनंतर दोन मित्र एकमेकांना भेटत असल्याचे चित्र या मालिकेच्या प्रोमोमधून पाहायला मिळाले. उमेश कामत आणि मुक्ता बर्वे यांच्या अजूनही बरसात आहे या मालिकेत देखील असेच कथानक रंगवले आहे. त्यामुळे ही नवी मालिका देखील मैत्रीच्या नात्यातली दरी कमी करणार असल्याचे दिसून येते. या नव्या मालिकेच्या एंट्रीमुळे झी मराठीवरील एक मालिका एक्झिट घेणार आहे. सध्या येऊ कशी तशी मी नांदायला ही मालिका अजून नव्या ट्रॅकवर आलेली आहे. शिवाय मालिकेतील अभिनेत्री किशोरी अंबिये यांनी देखील मालिका संपणार नसल्याचे सांगितले आहे. त्यामुळे या मालिकेचे कथानक तूर्तास तरी संपणार नसल्याचे स्पष्ट होते.

मात्र झी मराठीवरील टीआरपी रेसमध्ये मागे असलेली ‘तुझ्या माझ्या संसाराला आणि काय हवं’ ही मालिका लवकरच प्रेक्षकांचा निरोप घेत असल्याचे दिसून येते. सिद्धार्थ आणि आदिती यांच्यात अमेरिकेला जाण्यावरून वाद सुरू आहेत हे वाद लवकरच मिटून ही मालिका प्रेक्षकांचा निरोप घेईल असे वर्तवले जात आहे. त्यामुळे या मालिकेच्या जागी रात्री ९.०० वाजता तू तेव्हा तशी ही नवी मालिका दाखल होईल असे तर्क लावले जात आहेत. येत्या काही दिवसातच झी मराठीवरील कोणती मालिका एक्झिट घेणार हे समोर येईल. तूर्तास तू तेव्हा तशी या नव्या मालिकेनिमित्त शिल्पा तुळसकर आणि स्वप्नील जोशीचे यांचे अभिनंदन.आणि मालिकेच्या यशस्वी वाटचालीसाठी खूप शुभेच्छा.