स्मार्ट जोडी रिऍलिटी शोची विनर ठरली मराठमोळी अभिनेत्री.. मिळाला एवढ्या लाखांचा धनादेश

आजवर अनेक प्रसिद्ध हिंदी रिऍलिटी शोमध्ये मराठमोळ्या कलाकारांनी बाजी मारलेली पाहायला मिळाली आहे. हिंदी  इंडियन आयडॉलचा पहिला सिजन मराठमोळ्या अभिजित सावंतने जिंकला होता. तर नच बलीये या रिऍलिटी शोचा पहिला सिजन सचिन पिळगावकर आणि सुप्रिया पिळगावकर यांनी जिंकलेला पाहायला मिळाला. तर नुकताच झालेला हिंदी बिग बॉसच्या १५ व्या सिजनमध्येही मराठमोळ्या तेजस्वी प्रकाशने बाजी मारलेली पाहायला मिळाली. आता असाच आणखी एक मानाचा तुरा अंकिता लोखंडे आणि विकी जैन यांनी पटकावलेला पाहायला मिळतो आहे.

काही महिन्यांपूर्वीच अंकिता लोखंडे आणि विकी जैन यांचे मोठ्या थाटात लग्न पार पडले होते. लग्नानंतर अवघ्या काही दिवसातच या दोघांनी ‘स्मार्ट जोडी’ या रिऍलिटी शोमध्ये सहभाग दर्शवला. स्मार्ट जोडी या पहिल्या वहिल्या सिजनचा किताब अभिनेत्री अंकिता लोखंडे आणि विकास जैन यांनी पटकावलेला पाहायला मिळतो आहे. नुकताच या शोचा ग्रँड फिनाले पार पडला असून रितेश देशमुख आणि जेनेलिया देशमुख या दोघांनी फिनालेमध्ये हजेरी लावली. त्यांच्या हस्ते विजयी जोडीला ‘गोल्डन गटबंधन’ ट्रॉफी देण्यात आली. या ट्रॉफीसोबतच २५ लाखांचा धनादेश अंकिता आणि विकीला देण्यात आला.

या रिऍलिटी शोमध्ये बलराज सयाल आणि दीप्ती तुली यांनी फर्स्ट रनरअपचा मान पटकावला. भाग्यश्री, राहुल महाजन, अर्जून बिजलानी, मोनालीसा आपल्या पार्टनरसोबत या शोमध्ये स्पर्धक म्हणून सहभागी झाले होते. मनीष पॉलने सूत्रसंचालन करत स्पर्धकांना वेगवेगळे टास्क दिले होते. शोमध्ये सहभागी झालेल्या सदस्यांनी आपापल्या जोडीदाराची अनेक गोड गुपितं उघड केली होती. त्यामुळे हा रिऍलिटी शो प्रेक्षकांची पसंती मिळवताना दिसला. सहभागी झालेल्या एकचढ एक सरस ठरलेल्या स्पर्धकांना  मागे टाकून अंकिता आणि विकी यांनी विजयी होण्याचा मान पटकावला आहे. अंकिताचा हिंदी सृष्टीतला प्रवास खूपच खडतर होता.

पवित्र रिश्ता या मालिकेमुळे अंकिता प्रेक्षकांच्या घराघरात पोहोचली होती. काही मोजके बॉलिवूड चित्रपट आणि मालिकेतून काम करत असताना तिला खूप स्ट्रगल करावा लागला. अशातच लग्नानंतर तिने जिंकलेली ही ट्रॉफी तिच्या आनंदात अधिक भर घालताना पाहायला मिळत आहे. हा रिऍलिटी शो जिंकल्यानंतर अंकिताने या शोमधले काही खास क्षण आपल्या चाहत्यांसोबत शेअर केले आहेत. मराठमोळी अभिनेत्री विजयी झाल्याबद्दल मराठी प्रेक्षकांनी विशेष कौतुक केले आहे. विजयी स्मार्ट जोडी अंकिता आणि विकी यांच्यावर सेलिब्रिटींनी देखील अभिनंदनाचा वर्षाव केला आहे.