पुष्पा फ्लॉवर समझे क्या? फायर है अपून.. चला हवा येऊ द्या मंचावर पुष्पा भाऊची धमाल

दाक्षिणात्य सिनेसृष्टीतील अभिनेता अल्लू अर्जुन सध्या पुष्पा द राईज या चित्रपटामुळे चांगलाच चर्चेत आला आहे. चित्रपटात असलेला त्याचा रावडी अंदाज सर्वांच्याच मनावर राज्य करत आहे. अशात चला हवा येऊ द्या या शोमध्ये सर्वच चित्रपटांवर विनोद आणि पोट दुखेपर्यंत हसवणारे पंच काढले जातात. तर अल्लू अर्जुनचा पुष्पा द राईज चित्रपट चला हवा येऊ द्याच्या मंचापासून कसा काय दूर राहणार. सध्या सोशल मीडियावर पुष्पाच्या लूकमध्ये अनेक जण रील व्हिडिओ बनवताना दिसत आहेत. अशात भाऊ कदमने देखील पुष्पाच रुप धारण करुन लोकांना पोट दुखेपर्यंत हसवल आहे. तर श्रेया बुगडे हिने श्रीवल्ली आणि कुशल बद्रिकेने पुष्पाचा मित्र केशवची भूमिका साकारत आहे.

सागर कारंडे, भारत गणेशपुरे यांच्या सोबतचा हा प्रोमो व्हिडिओ पोस्ट करण्यात आला आहे. जो सध्या सोशल मीडियावर खूप व्हायरल होताना दिसतोय. यामध्ये भाऊने साकारलेल्या हिरोचं नाव फुसका असं आहे. मुळात पुष्पा नावाचं फुसका हे नाव केल्यानेच अनेक जण खूप हसू लागले. त्यानंतर नावाप्रमाणे पुष्पा आणि फुसका यांच्यातील फरक त्यांच्या वागणुकीवरुन देखील समजत आहे. भाऊने साकारलेला हा फुसका पाहण्यासाठी त्यावेळी सेटवर स्वप्नील जोशीसह महेश मांजरेकर तसेच बॉलिवूड अभिनेता विवेक ओबेरॉय देखील उपस्थित आहे. भाऊने आजवर अनेक कलाकारांचा अभिनय केला आहे. त्यात काही महिलांची पात्र देखील त्याने साकारली आहेत. चला हवा येऊ द्या या शोमध्ये हिरोची किंवा मुख्य भूमिका ही नेहमी त्याला दिली जाते.

भाऊने साकारलेली शांताबाई देखील आज घराघरात पोहोचली आहे. सुनील शेट्टी पासून प्रभास आणि आता अगदी अल्लू पर्यंत त्याने अनेक कलाकारांना विनोदी अंदाजात सर्वांसमोर आणलं आहे. भाऊची एन्ट्री एवढी मजेशीर असते की, तो सेटवर येताच सर्वत्र एकच हशा पसरतो. श्रेया कुशल आणि भाऊ यांची कॉमेडी पुन्हा एकदा रसिक प्रेक्षकांना खळखळून हसविण्यासाठी सज्ज झाली आहे. भाऊचा पांडू हा चित्रपट देखील अजूनही चर्चेत आहे. या चित्रपटात त्याने केलेल्या अभिनयाचे अजूनही कौतुक होताना दिसते. चित्रपटातील गाणी आणि सोनाली कुलकर्णी बरोबर असलेल्या त्याच्या अभिनयाला प्रेक्षकांनी चांगलेच डोक्यावर घेतलं आहे.