बऱ्याच प्रतीक्षेनंतर प्रसिद्ध अभिनेत्रीचे मालिकेत पुनरागमन..

दोन तीन मालिका करून प्रसिद्धी मिळवणारे कलाकार कालांतराने अभिनय क्षेत्रापासून थोडेसे बाजूला झालेले पाहायला मिळतात. अर्थात उत्तम अभिनय क्षमता असूनही केवळ चांगल्या भूमिकेच्या प्रतीक्षेत असल्याने ही कलाकार मंडळी या क्षेत्रापासून दूर राहिलेली दिसतात. मात्र आता अशीच अभिनेत्री बऱ्याच प्रतीक्षेनंतर पुन्हा एकदा मालिकेत सक्रिय झालेली पाहायला मिळणार आहे. ही अभिनेत्री म्हणजे मयुरी वाघ होय. झी मराठीवरील अस्मिता या लोकप्रिय मालिकेमुळे प्रेक्षकांच्या घराघरात पोहोचलेली मयुरी वाघ प्रसिद्धीच्या शिखरावर होती. मधल्या काळात तिने काही मालिका साकारल्या, परंतु हवी तशी ती चर्चेत राहिली नाही.

पण आता मयुरी लवकरच एका तगड्या भूमिकेतून प्रेक्षकांच्या भेटीला येत आहे. तिच्या पुनरागमनाबाबत चाहत्यांनी स्वागत केले आहे. सोनी मराठी वाहिनीवर लवकरच एक अध्यात्मिक मालिका सुरू होत आहे. ‘आशीर्वाद तुझा एकवीरा आई’ या मालिकेतून मयुरी एकवीरा आईची भूमिका साकारत आहे. मयुरीकडे एक तगडी, आव्हानात्मक भूमिका आल्याचे स्पष्ट झाले आहे. नव्या मालिकेत अमृता पवार आणि अभिनय सावंत प्रमुख भूमिका साकारत आहेत. लग्नानंतर अमृता तुझ्या माझ्या संसाराला आणि काय हवं या मालिकेत सक्रिय होती. त्यानंतर तिची प्रमुख भूमिका असलेली ‘आशीर्वाद तुझा एकवीरा आई’ ही मलिका सोनी मराठी वाहिनीवर प्रसारित केली जात आहे. सोनी मराठीवरील आई माझी काळूबाई ही मालिका देखील अशाच धाटणीची पाहायला मिळाली होती.

नायिकेच्या आयुष्यात अनेक संकटं येतात त्या संकटातून एकवीरा आई नायिकेच्या पाठीशी कशी उभी राहते, याची ही कहाणी मालिकेत दाखवली जाणार आहे. मयुरी वाघ गेल्या काही वर्षांपासून मालिका सृष्टीपासून बाजूला होती. मयुरी ही थेटर आर्टिस्ट आणि विविध कार्यक्रमामध्ये डान्स परफॉर्मन्स सादर करताना दिसते. वचन दिले तू मला मालिकेतून मयुरीने छोट्या पडद्यावर पदार्पण केले होते. अस्मिता या लोकप्रिय मालिकेत मयुरी डिटेक्टिव्हच्या भूमिकेत झळकली होती. मालिकेवर प्रेक्षकांनी प्रचंड प्रेम दाखवल्याने जवळपास ३ वर्षे ही मालिका झी मराठी वाहिनीवर तग धरून होती. याच मालिकेत एकत्रित काम करत असताना पियुष रानडे सोबत तिचे प्रेम जुळून आले. २०१७ साली अस्मिता मालिकेने निरोप घेताच; या दोघांनी लग्न करण्याचा निर्णय घेतला.

लव्ह लग्न लोच्या, ती फुलराणी या मालिकांमधून ती महत्त्वपूर्ण भूमिका साकारताना दिसली. चला हवा येऊ द्या च्या मंचावर येऊन तिने विनोदी अभिनयाची झलक दाखवून दिली होती. मात्र यानंतर मयुरी अभिनय क्षेत्रातून ब्रेक घेऊन ती काही काळ बाजूला झालेली दिसली. नवरात्रीचे औचित्य साधून शेमारू मराठी बाणा या वाहिनीवर उत्सव नवरंगाचा प्रसारित करण्यात आला. मयुरी या कार्यक्रमाच्या कार्यकारी निर्मितीची धुरा सांभाळताना दिसली. प्रथमच निर्मितीची धुरा सांभाळत असल्याने तिच्यावर खूप दडपण होते. पण तिने हे शिवधनुष्य समर्थपणे पेलले होते. आता एकवीरा आईची दमदार भूमिका साकारत असल्याने मयुरी खूपच उत्साहात दिसत आहे. तिला या भूमिकेसाठी आणि मालिकेतील पुनरागमनासाठी खूप खूप शुभेच्छा.