किरण माने यांनी प्रसादची केली पोलखोल…

मराठी बिग बॉसच्या घरात गेल्या आठवड्यात राखी सावंतने प्रेक्षकांचे चांगले मनोरंजन केले. आपल्याला नापास केले म्हणून राखी अमृता देशमुखवर चिडलेली पाहायला मिळाली. तर विकेंडमध्ये बिग बॉसच्या घरातून स्नेहलता वसईकरला एक्झिट घ्यावी लागली. आपण नॉमीनेट केल्यामुळेच आपले सगळे मित्र असे बाहेर जातायेत हे पाहून अक्षय केळकरला मात्र रडू कोसळले होते. तर प्रसादने देखील ह्या घरातून बाहेर पडण्याची इच्छा व्यक्त केली होती, मात्र माझ्या हातात काहीच नाही असे म्हणत मांजरेकरांनी त्याला बाहेर जाण्यापासून थांबवले होते.

प्रसाद बिग बॉसच्या घरात कसा वागतो हे त्याच्या चाहत्यांना देखील अजूनही नीटसं कळलेलं नाही. त्यामुळे प्रसादचे वागणे एक गूढ बनून गेलेले आहे. याचा उलगडा स्वतः महेश मांजरेकर यांना देखील झालेला नाही. तो नेहमी कन्फ्युज असल्यासारखा का वाटतो? असा प्रश्न प्रेक्षकांना पडलेला आहे. प्रसादच्या प्रश्नावर मायबाप प्रेक्षक निर्णय घेण्यास समर्थ आहेत असे सांगितले. प्रसाद कधीही आपलं मत उघडपणे मांडताना दिसला नाही. अमृतासोबत बोलतानाही तो मनमोकळेपणाने फारसा बोललेला नाही. त्याच्या अशा वागण्याची पोलखोल आता किरण माने यांनीच केलेली पहायला मिळत आहे. प्रसाद आणि किरण माने यांच्यात जोरदार भांडण झालं आहे. काही लोकांना ठरवून डिप्रेशन येतं असे किरण माने प्रसादची पोलखोल करताना म्हणतात.

प्रसादचं वागणं हे काळानुसार बदलत असतं .शनिवारी बिग बॉसची चावडी भरते त्यावेळी प्रसाद लहरी असल्यासारखा वागतो. शनिवारी महेश सरांच्या चावडीवर तो अगदी निरागस असल्याचा भासवतो. त्याला खूप डिप्रेशन असल्याचे तो दाखवतो, त्यामुळे तो लहरी व्यक्ती आहे असे परखड मत किरण माने यांनी प्रसाद समोर व्यक्त केलं आहे. शनिवारी तू खूप डिप्रेस असतोस आणि रविवारी मात्र ते कुठं गायब होतं, असे म्हणत किरण माने प्रसादचे हसू करतात. किरण मानेच्या या बोलण्यावर प्रसाद मात्र खूप चिडतो. आपल्याला whimsical म्हणणारा किरण माने डॉक्टर आहे का? असा उलट प्रश्न तो किरण माने यांना विचारतो. यावर घरातील सर्वजण बघ्याच्या भूमिकेत मौन बाळगताना दिसले.

अक्षय सोबत प्रसादचा वाद झाला तेव्हा प्रसादने मर्यादा ओलांडत अक्षयला त्याच्या आई वडिलांवरून शिव्या दिल्या होत्या. त्यानंतर प्रसादने अक्षयची जाहीरपणे माफी देखील मागितली होती. खरं तर प्रसादच्या या वागण्यावर प्रेक्षकांनी देखिल नाराजी दर्शवली होती. दरम्यान बिग बॉसच्या ह्या आठवड्यात राखीने चांगलाच धुमाकूळ घातलेला पाहायला मिळाला. चंद्रमुखीच्या अवतारात राखी घरभर फिरत आहे. राखीच्या अंगात शिरलेलं भूत बाहेर काढण्यासाठी किरण माने मजेशीर प्रयत्न करत आहेत. यामुळे प्रेक्षकांचे चांगलेच मनोरंजन होत आहे.