माथेरानच्या जंगलात फेकला आईचा मृतदेह.. अभिनेत्रीच्या निधनाने कलाकार भावुक

​​जुहू मधील एका ७४ वर्षीय महिलेची हत्या करण्यात आली. या महिलेचा मृतदेह सापडल्यानंतर तपास सुरू झाला आणि या घटनेचे धागेदोरे शोधत पोलिसांना या घटनेबाबत धक्कादायक माहिती समोर आली. मृत झालेल्या या ७४ वर्षीय महिलेचे नाव आहे वीणा कपूर. वीणा कपूर या हिंदी मालिका अभिनेत्री होत्या. मेरी भाभी या मालिकेत त्यांनी जवळपास ५ वर्षांहून अधिक काळ काम केले होते. मृत झालेल्या वीणा क​​पूर ​​यांचे नाव समजताच या मालिकेतील प्रसिद्ध अभिनेत्री निलू कोहली यांना धक्का बसला. आपल्या सहकलाकार वीणा कपूर या आत्महत्या करू शकत नाहीत असा विश्वास त्यांना होता.

गेल्या अनेक वर्षांपासून त्यांची खूप चांगली मैत्री होती. पण मागील काही वर्षांपासून त्यांच्याशी फारसे बोलणे होत नव्हते. या घटनेबाबत पोलिसांनी तपास सुरू केला असता, वीणा कपूर यांची हत्या त्यांचाच धाकटा मुलगा सचिन याने केली असल्याचे उघड झाले आहे. जुहू येथे वीणा कपूर यांच्या नावे असलेला एक फ्लॅट १२ कोटींचा होता. हा फ्लॅट मिळवण्यासाठीच सचिनने रागाच्या भरात आईला बेसबॉलच्या बॅटने मारले होते. जबर दुखापतीने आई वीणा यांचे निधन झाले. वीणा कपूर यांचा थोरला मुलगा सॉफ्टवेअर इंजिनिअर असून तो अमेरिकेत वास्तव्यास होता. आईची हत्या झाली असल्याचा संशय त्याला आला होता आणि म्हणूनच त्यादृष्टीने तपासाची पाऊले वळवण्यात आली होती.

सचिनला पोलिसांनी ताब्यात घेतले असून त्याने या गोष्टीचा उलगडा केला आहे. आईचा मृतदेह त्याने एका फ्रिजच्या कार्टनमध्ये पॅक केला. हा मृतदेह फेकण्यासाठी त्याने आपल्या नोकराची मदत घेतली होती. त्यानंतर मुंबई ते माथेरान असा प्रवास करून त्याने हा मृतदेह माथेरानच्या जंगलात फेकून दिला. सचिनने ही सर्व घटना पोलिसांसमोर उघड केली आहे. त्यामुळे आईच्या खुणाप्रकरणी सचिनवर कायदेशीर कारवाई केली जात आहे. निलु कोहली यांना ही बातमी समजताच त्यांनी वीणा कपूर याच्या घराचा एक फोटो शेअर केला आहे. वीणा कपूर यांच्या निधनाने मी खूप दुःखी झाले आहे असेही निलू कोहली यांनी म्हटले आहे.

तुमचं अशा प्रकारे जाणं मनाला चटका लावून गेले आहे, ही बातमी वाचून मला शब्दच सुचत नाहीयेत, पण तुम्ही जो स्ट्रगल केला आहे ते पाहून जिथे असाल तिथे खुश असाल अशी मी अशा करते, असे निलू कोहली यांनी म्हटले आहे. निलू कोहली यांनी या घटनेबाबत उघड करताच हिंदी सेलिब्रिटींनी खेद व्यक्त केला आहे. प्रॉपर्टीसाठी मुलगा इतकी खालची पातळी गाठेल यावर अनेकांनी आश्चर्य व्यक्त केलं आहे. वीणा कपूर खूप गुणी अभिनेत्री होत्या अशा भावना व्यक्त करत सेलिब्रिटींनी श्रद्धांजली वाहिली आहे.