माझी तुझी रेशीमगाठच्या दुसऱ्या पर्वाबद्दल श्रेयस तळपदेचा खुलासा.. त्यावर प्रार्थनाची भन्नाट प्रतिक्रिया

माझी तुझी रेशीमगाठ या मालिकेने प्रेक्षकांच्या मनात एक वेगळे स्थान निर्माण केले आहे. याच आणि नेहाच्या लग्नानंतर ही मालिका काही एपिसोडनंतर बंद करण्यात आली होती. मात्र प्रेक्षकांच्या आग्रहाखातर पुन्हा या मालिकेचे काही एपिसोड बनवण्यात आले. श्रेयस तळपदे, प्रार्थना बेहरे, संकर्षण कऱ्हाडे, मायरा वायकुळ या कलाकारांनी त्यांच्या सहजसुंदर अभिनयाने प्रेक्षकांची मनं जिंकून घेतली होती. ही कलाकार मंडळी पुन्हा एकदा एकत्र यावीत अशी प्रेक्षकांची ईच्छा आहे. त्यासाठी माझी तुझी रेशीमगाठ या मालिकेचा सिकवल यावा अशी मागणी प्रेक्षक करत आहेत. प्रेक्षकांची ही ईच्छा लवकरच पूर्ण होईल असे या कलाकारांचेही म्हणणे आहे.

संकर्षण, प्रार्थना, श्रेयस आणि मालिकेचे दिग्दर्शक अजय मयेकर या चौघांनी एकत्र प्रोजेक्ट करणार असल्याचे जाहीर केले होते. पण तो नवा प्रोजेक्ट काय असेल हे त्यांनी गुपित ठेवलेले होते. त्यानंतर ही सगळी टीम आपापल्या कामाला लागली. इकबाल चित्रपटानंतर श्रेयस तळपदे आणि प्रतीक्षा लोणकर आगामी चित्रपटाच्या शूटिंगनिमित्त पुन्हा एकत्र आली. या सेटवर श्रेयसने एक गुपित उलगडत, माझी डार्लिंग माझ्या भेटीला आली असे म्हणत नुकताच सेटवरचा एक व्हिडिओ शेअर केला आहे. त्या व्हिडिओला कॅप्शन देताना श्रेयस म्हणतो की, वो घडी जिसका आप सभी को इंतजार था. आमची ही रेशीमगाठ कधीही तुटायची नाही! असे म्हणत तो त्याच्या चाहत्यांचे उत्सुकता वाढवताना दिसतो. श्रेयसची डार्लिंग म्हणजे प्रार्थना बेहरे असावी असा सगळ्यांनी अंदाज बांधलेला असतो.

तेवढ्यात तिथे अजय मयेकर असल्याचे तो जाहीर करतो. चित्रपटाच्या सेटजवळच माझी तुझी रेशीमगाठ मालिकेचे दिग्दर्शक अजय मयेकर यांचा नवीन प्रोजेक्ट चालू आहे. त्यानिमित्ताने श्रेयसची अजय सोबत भेट घडून आली. याचवेळी माझी तुझी रेशीमगाठ या मालिकेचे दुसरे पर्व सुरू व्हावे. अशी श्रेयसने इच्छा व्यक्त केली मात्र प्रार्थनाकडे डेट नाहीत ही खंत तो बोलून दाखवतो. तेव्हा प्रार्थना या व्हिडिओवर प्रतिक्रिया देताना म्हणते की, तुमच्या दोघांसाठी मी कधीही डेट्स द्यायला तयार आहे. ही मज्जा अनुभवायला मी तिथे असायला हवी होते असे प्रार्थना म्हणते. या कलाकारांसोबत आनंद काळे, स्वाती देवल यांनीही मजेशीर प्रतिक्रिया देत आम्हीही मालिकेत काम करण्यासाठी उत्सुक आहोत असे म्हटले आहे. तेव्हा ही कलाकार मंडळी गमती गमतीत माझी तुझी रेशीमगाठ मालिका सुरू होणार असे म्हणत असले तरी ती प्रत्यक्षात लवकरात लवकरच सुरू करावी अशी प्रेक्षकांनी अपेक्षा व्यक्त केली आहे.