तो पुन्हा येणार.. झी मराठी वाहिनिवरील नव्या शोमुळे प्रेक्षकांची वाढली उत्सुकता

झी मराठी वाहिनीचा घटलेला टीआरपी पाहून या वाहिनीने नवनवीन प्रयोग करून प्रेक्षकांना आपल्या मालिकांकडे वळवण्याचा  प्रयत्न केला आहे. गेल्या काही वर्षांपासून वाहिनीने नवनवीन मालिका, रियालिटी शो प्रेक्षकांच्या भेटीला आणले. मात्र त्याकडे प्रेक्षकांनी पाठ फिरवलेली पाहायला मिळाली. फु बाई फु शोचे अनेक पर्व झालेले असल्याने वाहिनीने पुन्हा एकदा हा शो प्रेक्षकांच्या भेटीला आणला. मात्र अवघ्या दीड महिन्यातच या शोला आपला गाशा गुंडाळावा लागला. तर काही मालिकांना देखील प्रेक्षक पुरेसा प्रतिसाद देत नसल्याचे पाहून त्या ताबडतोब बंद पाडण्यात आल्या. मात्र आता लवकरच प्रेक्षकांच्या मनोरंजनासाठी आणखी एक नवीन शो वाहिनी घेऊन येणार आहे.

तो पुन्हा येणार असे कॅप्शन देत वाहिनीने प्रेक्षकांचे लक्ष्य या नव्या शोकडे वेधले आहे. फोन वाजणार आणि न ऐकलेले अनेक किस्से नव्याने बाहेर निघणार. तो पुन्हा येणार असे म्हणत झी मराठी पुन्हा एकदा त्यांचा जुना रियालिटी शो घेऊन येणार आहे. हा शो कोणता आहे यावर प्रश्नचिन्ह उपस्थित केले जात आहेत. मात्र खुपते तिथे गुप्ते या शोने प्रेक्षकांची मनं जिंकली होती. या शोमध्ये कलाकारांना आमंत्रित करण्यात येत होते. जोडीने आलेले हे कलाकार आपल्या खाजगी आयुष्याबाबत भरभरून बोलत होते. सोबतच अनेक गमतीदार किस्सेही प्रेक्षकांना ऐकवत होते. या शोमध्ये गुप्ते म्हणजेच अवधूत गुप्ते सूत्रसंचालनाचे काम करताना दिसत होता. तर आलेल्या पाहुण्यांच्या जवळच्या व्यक्तींशी तो फोनद्वारे संवाद साधून देत होता.

हा भावुक क्षण प्रेक्षक आजही खूप मिस करत आहेत, त्याचमुळे झी मराठी वाहिनीने पुन्हा एकदा असाच शो प्रेक्षकांच्या भेटीला आणण्याचा घाट घातला आहे. नव्या शोच्या दिलेल्या कॅप्शन वरूनच हा शो खुपते तिथे गुप्ते असावा असा अंदाज बांधला आहे. वाहिनीने दिलेल्या सर्व हिंट देखील या शो सोबत मिळत्या जुळत्या वाटत आहेत. त्यामुळे अवधूत गुप्ते पुन्हा एकदा आपल्या अंदाजात हा रियालिटी शो गाजवणार अशी अपेक्षा व्यक्त केली जात आहे. या शोच्या जुन्या आठवणी आजही युट्युबवर तुम्हाला पाहायला मिळतील. सेलिब्रिटींच्या मुलाखतीत अनेक गुपितं गुप्ते यांनी उघड केलेले आहेत. या आठवणी पुन्हा एकदा ताज्या व्हाव्यात अशी प्रेक्षकांची देखील इच्छा आहे. त्यामुळे झी वाहिनीचा हा शो टीआरपीचा आकडा नक्कीच पार करेल याची शाश्वती दिली जात आहे.

प्रेक्षकांना सेलिब्रिटींच्या मुलाखत पाहायला नक्कीच आवडेल. मात्र बस बाई बस या शो सारखा नसावा अशी अपेक्षा आहे. बस बाई बस या शोचे सूत्रसंचालन सुबोध भावे याने केले होते. मात्र हा शो प्रेक्षकांनी काही प्रमाणात नाकारलेला पाहायला मिळाला होता. खुपते तिथे गुप्ते हा शो पुन्हा सुरू झाल्यास प्रेक्षकांचा अपेक्षाभंग होणार नाही याची खात्री शोचा प्रोमो आल्यावरच देता येईल. त्यासाठी प्रेक्षकांना अजून थोडी वाट पाहावी लागणार आहे.