सोशल मीडियावर गाणं गाणाऱ्या मुलाचं नशीब फळफळलं.. थेट सोनी वाहिनीच्या मंचावर

काही दिवसांपूर्वी मस्ती चित्रपटातील दिल दे दिया है जान तुम्हें देंगे, हे गाणं गाताना एका कलाकाराचा व्हिडीओ सोशल मीडियावर खूपच व्हायरल झाला होता. गाण्यातील त्याचा आवाज अनेकांना आवडला असल्याच्या प्रतिक्रिया सोशल मीडियावर दिल्या जात होत्या. त्याचा हा व्हिडीओ अल्पावधीतच खूप प्रमाणावर व्हायरल करण्यात आला. सोशल मीडियाच्या माध्यमातून प्रसिद्धी मिळवत असलेल्या या कलाकाराचे नाव आहे अमरजीत जयकर. अमरजीत जयकरला गाण्याची आवड आहे. तो समसतीपुर बिहारचा रहिवासी आहे. एका छोट्याशा घरात तो आपल्या कुटुंबासोबत राहतो. गाण्याची आवड असल्याने अमरजीत लग्नात एखाद्या कार्यक्रमात गाणी गातो.

अमरजीतने बिहार इंडियन आयडॉलच्या १२ व्या सिजनमध्ये सहभाग देखील दर्शवला होता. आपल्या आवाजाच्या जादूने तो शोचा विजेता ठरला होता. पोटापाण्यासाठी अमरजीत काही बँडसाठी गाणी गातो आणि विना म्युजिक लाईव्ह गाण्याचे व्हिडीओ शेअर करतो. त्यामुळे त्याच्या गाण्याची भुरळ अनेकांना पडली आहे. इन्स्टाग्राम चाहत्यांनी त्याचा व्हिडीओ पाहिला आणि मोठ्या प्रमाणावर व्हायरल केला. या सोशल मीडियाने अनेक कलाकारांचे नशीब फळफळले आहे. याचा फायदा आता अमरजीतला देखील झाला आहे. नुकतेच सोनी वाहिनीवर इंडियन आयडॉलच्या मंचावर अमरजीतला आमंत्रित करण्यात आले. यावेळी अमरजीतने पुन्हा तेच गाणे गाऊन परिक्षकांची मनं जिंकून घेतली. एवढेच नाही विशालने त्याला पुढच्या इंडियन आयडॉलच्या सिजनमध्ये सहभागी होण्याची ऑफर सुद्धा देऊ केली आहे.

हिमेश रेशमियाने अल्बममध्ये गाण्याची नामी संधी दिली आहे. विशालने अमरजीतला शेखरला भेट आणि आमच्यासोबत एक दोन नाही तर चार गाणी गा असे म्हणत मोठी संधीच दिली आहे. त्यामुळे अमरजीत सध्या प्रसिद्धीच्या चांगलाच झोतात आलेला आहे. खरं तर अमरजीतला खरी प्रसिद्धी मिळवून देणारा दुसरा तिसरा कोणी नसून बॉलिवूड अभिनेता सोनू सूद आहे. सोनू सूदने आजवर अनेकांना मदतीचा हात देऊ केला आहे. अमरजितचा एक गाणं गातानाचा व्हिडीओ त्याने शेअर केला होता. सोनूने मुंबईला बोलावून चित्रपटात गाणं गायची संधी देऊ केली होती. यानंतर अमरजीत सोशल मीडियावर चांगला प्रसिद्धी मिळवू लागला. याच प्रसिद्धीचा फायदा त्याला इंडियन आयडॉलच्या मंचावर घेऊन गेला आहे. हिमेश रेशमियाच्या तेरी आशिकी ने मेरा या आगामी अल्बममध्ये तो गाणं गाताना दिसणार आहे.