​स्टार प्रवाहच्या ४ मालिकांना मागे टाकत या मालिकेने मिळवले अव्वल स्थान

स्टार प्रवाह वाहिनीने गेल्या काही वर्षांपासून प्रेक्षकांच्या मनात जागा बनवली आहे. या वाहिनीवरील बहुतेक सर्वच मालिका टॉप दहाच्या यादीत प्रवेश करताना दिसल्या आहेत. यात झी मराठीची माझी तुझी रेशीमगाठ ही केवळ एकच मालिका लोकप्रियतेच्या बाबतीत सातव्या क्रमांकावर येऊन ठेपली आहे. आई कुठे काय करते या मालिकेवर प्रेक्षकांनी भरभरून प्रेम दाखवलं आहे. त्यामुळे या मालिकेचा टीआरपी सर्वात जास्त पाहायला मिळाला. त्यापाठोपाठ रंग माझा वेगळा या मालिकेवर देखील प्रेक्षकांनी प्रेम केलं, त्यामुळे या दोन्ही मालिका टॉपच्या यादीत पुढे मागे पाहायला मिळाल्या. नुकतेच या आठवड्याच्या टीआरपीची एक यादी प्रसिद्ध करण्यात आली.

या यादीत तुझेच मी गीत गात आहे या मालिकेने अव्वल स्थान पटकावलेले पाहायला मिळत आहे. तुझेच मी गीत गात आहे या मालिकेत मल्हार आणि स्वरा या बाप लेकीच्या नात्याची जुळून आलेली केमिस्ट्री प्रेक्षकांना खूप भावली आहे. मोनिकाचे कटकारस्थान निरागस स्वराच्या विरोधात असले तरी ती यातून नेहमीप्रमाणे सुखरूप निसटून जाते. स्वरा मल्हारच्या जवळ जाऊ नये म्हणून मोनिका स्वराला घराबाहेर काढते तिच्यासोबत क्षमा देखील घराबाहेर पडते मात्र येत्या काही भागात स्वराला पुन्हा घरात घेण्यासाठी मोनिकाला क्षमाचे पाय धरावे लागणार आहेत. याचमुळे मालिकेचा टीआरपी वाढलेला पाहायला मिळाला आहे. म्हणूनच स्वरा दीपा आणि अरुंधतीला देखील भारी पडल्याचे चित्र दिसत आहे.

यामुळे रंग माझा वेगळा आणि आई कुठे काय करते या मालिकांचा टीआरपी कमी झाला आहे. रंग माझा वेगळा या मालिकेला दुसऱ्या क्रमांकावर समाधान मानावे लागत आहे तर सुख म्हणजे नक्की काय असतं, ठिपक्यांची रांगोळी आणि त्यानंतर आई कुठे काय करते या मालिकेचा क्रमांक लागतो. आई कुठे काय करते या मालिकेत आता आणखी एक ट्विस्ट आल्याने ही मालिका पुन्हा टीआरपी वाढवणार असल्याने दिसते. संजनाला अनिरुद्धपासून दिवस गेले आहेत मात्र अनिरुद्ध ही जबाबदारी स्वीकारायला तयार नाही. त्यामुळे अरुंधती संजनाच्या बाजूने बोलताना दिसत आहे. त्यामुळे मालिकेचा हा ट्विस्ट टीआरपी वाढवणार असल्याची चिन्ह स्पष्ट पाहायला मिळाली आहेत.