नेहाच्या नवऱ्याची मालिकेत एन्ट्री.. हा प्रसिद्ध अभिनेता साकारणार भूमिका

माझी तुझी रेशीमगाठ या मालिकेत नुकतेच यश आणि नेहाच्या लग्नाचा सोहळा पार पडला. लग्नानंतर नेहाने पहिली वटपौर्णिमा साजरी केलेली पाहायला मिळाली. मालिकेत आजोबांनी नेहाकडे लॉकरची चावी सुपूर्त केली आहे जेणेकरून ती घरासाठी योग्य निर्णय घेईल. मात्र सिम्मी काकू नेहकडून ती चावी घेतात आणि त्याची डुप्लिकेट चावी बनवून घेतात. त्यामुळे हा घोळ पुढे नेहाच्या अंगलट आलेला पाहायला मिळणार आहे. येणाऱ्या काही भागांमध्ये मालिकेत सिम्मी काकू नेहाच्या विरोधात कुठले कटकारस्थान राचणार हे पाहायला मिळणार आहे. मात्र या संकटातून नेहा सुखरूप बाहेर पडणार का याचीही उत्सुकता आहे.

हे ट्विस्ट येतील तेव्हा येतील मात्र मालिकेत लवकरच नेहाच्या पहिल्या नवऱ्याची एन्ट्री झालेली पाहायला मिळणार आहे. नेहा आणि यशच्या लग्नाची बातमी पेपरमध्ये छापून आली होती तेव्हाच नेहाच्या पहिल्या नवऱ्याची या मालिकेत एन्ट्री झाली होती. पत्रकार बनून तो नेहा आणि यशच्या लग्नात हजर देखील राहीला मात्र त्याचा चेहरा दाखवण्यात आला नव्हता. नेहासोबतचा फोटो त्याने गिफ्ट म्हणून एका बॉक्समध्ये ठेवला होता मात्र नंतर त्याने स्वतःचा फोटो फाडून केवळ नेहाचाच फोटो त्यात ठेवला होता. हे गिफ्ट सिम्मी काकूंच्या नजरेत आल्याने त्यांना या फोटोवर शंका आली होती. अर्थात सिम्मी काकू या फोटोवरून नक्कीच काहीतरी घडवून आणणार हे नक्की. परंतु त्याअगोदर नेहाचा पहिल्या नवऱ्याची झलक प्रेक्षकांना पाहायला मिळाली आहे.

ही भूमिका अभिनेता निखिल राजेशिर्के साकारणार आहे. निखिल हा मराठी चित्रपट, मालिका तसेच नाट्यअभिनेता आहे. बालमोहन विद्यामंदिर येथून त्याने शालेय शिक्षण पूर्ण केले तर माटुंगा येथील रुईया कॉलेजमधुन पदवी मिळवली. बालपणापासून अभिनयाची आवड असलेल्या निखिलने एकांकिका, नाट्यस्पर्धामधून भाग घेतला. सोनी मराठीवरील अजूनही बरसात आहे मालिकेत तो काहीसा विरोधी भूमिकेत पाहायला मिळाला होता. आभाळमाया, दे धमाल, एक मोहोर अबोल, दिल्या घरी तू सुखी राहा, लगोरी, प्रीती परी तुजवरी अशा अनेक गाजलेल्या मालिकेतून तो छोटी मोठ्या पण तितक्याच महत्वपूर्ण भूमिकेत दिसला. माझी तुझी रेशीमगाठ या मालिकेत त्याला नेहाच्या पहिल्या नवऱ्याची भूमिका साकारण्याची संधी मिळाली आहे.

प्रार्थना बेहरे आणि श्रेयस तळपदे या तगड्या कलाकारांच्या तोडीसतोड भूमिका असल्याने या पात्रासाठी तितक्याच दमदार अभिनेत्याची आवश्यकता होती. अर्थात ही भूमिका विरोधी जरी असली तरी नायिकेचा नवरा म्हणून तेवढीच महत्वाची मानली जाते. प्रेक्षकांची ही अपेक्षा निखिल राजेशिर्के त्याच्या अभिनयाने नक्कीच पूर्ण करणार याची खात्री आहे. कारण निखिलने या मालिकेअगोदर उमेश कामत आणि मुक्ता बर्वे सोबत अजूनही बरसात आहे या मालिकेत काम केले होते. नायिकेवर एकतर्फी प्रेम करणारा निखिल दिवाण त्याने उत्तम साकारला होता. या मालिकेत देखील निखिलला अशाच धाटणीची भूमिका मिळाली आहे, त्यामुळे या भूमिकेबाबत तो खूपच उत्सुक आहे. या नव्या मालिकेसाठी आणि तितक्याच तगड्या भूमिकेसाठी निखीलचे अभिनंदन आणि शुभेच्छा!