भाग्य दिले तू मला मालिकेत या अभिनेत्याची एन्ट्री.. रत्नमालाचे पूर्वायुष्य उलगडणार

कलर्स मराठीवरील भाग्य दिले तू मला या मालिकेत आता सकारात्मक गोष्टी घडताना दिसणार आहेत. कारण सुदर्शनच्या कारस्थानाची शिक्षा त्याला रातन्मलाकडून मिळालेली आहे. रत्नमालाने सुदर्शनला घरातून हाकलून दिले आहे. त्यामुळे राज कावेरीने देखील आता सुटकेचा निश्वास टाकला आहे. कावेरी आणि राजच्या नात्यात आता पुन्हा कुठले विघ्न नको म्हणून कावेरी प्रार्थना करत आहे. आता सगळं काही सुरळीत सुरू असतानाच मालिकेत आणखी एक आश्चर्यकारक ट्विस्ट येणार आहे.

मालिकेच्या येणाऱ्या ट्विस्टमध्ये रत्नमालाचे पूर्वायुष्य उलगडण्याचा प्रयत्न होणार आहे. रत्नमाला आणि तिचा नवरा अनिरुद्ध यांची पुन्हा एकदा भेट घडून येणार असल्याने हा ट्विस्ट नेमका काय आहे हे पाहण्यासाठी प्रेक्षक नक्कीच उत्सुक झाले आहेत. मालिकेत लवकरच अनिरुद्धची एन्ट्री होत आहे. राज गाडी चालवत असताना त्याच्या गाडीसमोर एक व्यक्ती येतो. गाडीचा धक्का लागल्याने तो व्यक्ती खाली पडतो. या व्यक्तीला रत्नमाला अनिरुद्ध अशी हाक मारते. तेव्हा रत्नमालाचे तरुणपण मालिकेत रेखाटले जाणार आहे. अनिरुद्धच्या भूमिकेत अभिनेते तुषार दळवी यांची एन्ट्री होत आहे.

तर रत्नमाला आणि अनिरुद्धचे तरुणपण मालिकेत रेखाटताना त्यांना तरुण दाखवण्यात येणार आहे. बऱ्याच प्रतीक्षेनंतर तुषार दळवी भाग्य दिले तू मला मालिकेतून छोट्या पडद्यावर परतणार आहेत. मेरे साई या हिंदी मालिकेत तुषार दळवी यांनी साई बाबांची भूमिका गाजवली होती. दुहेरी मालिकेनंतर तुषार दळवी पुन्हा एकदा मराठी मालिकेत झळकताना दिसणार आहेत. भाग्य दिले तू मला या मालिकेतून ते आता निवेदिता सराफ यांच्या सोबत प्रमुख भूमिकेत पाहायला मिळणार आहेत. त्यामुळे मालिकेतल्या या रंजक घडामोडी पाहण्यासाठी प्रेक्षक निश्चितच उत्सुक झाले आहेत.