तुनीषा शर्माच्या बॉयफ्रेंडला अटक.. शिजान खान संशयाच्या विळख्यात

हिंदी चित्रपट तसेच हिंदी मालिका अभिनेत्री तुनीषा शर्मा हिने आज आत्महत्या केली आणि सर्वत्र एकच खळबळ माजली. तुनीषा शर्मा हिने आत्महत्या का केली असा प्रश्न सोशल मीडियावर उपस्थित केला आहे. तुनीषा केवळ २० वर्षांची होती एवढ्या कमी वयात तिने अभिनेत्री बनून मोठे यश मिळवले होते. लाखोंच्या संख्येने तिचे चाहते तिला फॉलो करत होते. त्यामुळे तुनीषाची आत्महत्या सगळ्यांना धक्कादायक वाटत आहे. वसई येथे अली बाबा दास्तान ए काबूल या मालिकेचे शूटिंग चालू होते. तुनीषाने आपला सिन पूर्ण केला आणि ती मालिकेचा कलाकार शिजान मोहोम्मद खानच्या मेकअप रूममध्ये गेली होती.

दरम्यान शिजानने देखील त्याचा शॉट पूर्ण केला आणि विश्रांतीसाठी तो आपल्या मेकअप रुमजवळ गेला. आतून दरवाजा उघडत नसल्याने त्याने आवाज दिला. मात्र बऱ्याच प्रतीक्षेनंतर देखील दरवाजा उघडत नसल्याने त्याला थोडीशी शंका आली. मालिकेच्या कलाकारांनी एकत्र येऊन दार तोडण्याचा प्रयत्न केला तेव्हा तुनीषाने गळफास घेतला असल्याचे उघड झाले. त्यानंतर तुनीषाला नजीकच्या रुग्णालयात दाखल करण्यात आले, मात्र त्यावेळी डॉक्टरांनी मृत घोषित केले. तुनीषाच्या आत्महत्येची बातमी वाऱ्यासारखी पसरली. वसई पोलिसांनी रुग्णालयात धाव घेऊन मृतदेह ताब्यात घेतला आणि आत्महत्येची शहानिशा करण्यास सुरुवात केली. तुनीषा ही मालिकेचा नायक शिजान खानला डेट करत होती अशी चर्चा होती.

शिजानवर पोलिसांना संशय आल्याने त्यांनी त्याला ताब्यात घेतले आहे. दरम्यान तुनीषा प्रेग्नंट होती अशीही बातमी मीडियाच्या माध्यमातून पसरवली जात आहे. शिजानच्या रूममध्ये तुनीषा काय करत होती याची सखोल चौकशी केली जात आहे. एवढा टोकाचा निर्णय कशामुळे घेतला असेही बोलले जात आहे. तुनीषाच्या कुटुंबाला देखील शिजानवर संशय आहे. प्रॉपर्टी मिळवण्यासाठी तुनीषाला आपल्या जाळ्यात ओढले असा आरोप तिच्या कुटुंबियांनी शिजानवर लावला आहे. त्यामुळे शिजानवर संशयाचे सावट पसरले आहे. शिजान खान हा तुनीषासोबत अनेकदा पाहिला गेला. पोलिसांना देखील त्याच्यावर संशय आला आहे. या प्रकरणी चौकशी करण्यासाठी शिजानला अटक करण्यात आली आहे.

तुनीषाच्या मृत्यमागचे धागेदोरे लवकरच उलगडतील असा विश्वास पोलिसांना आहे. तुनीषा शर्मा हिने बालपणापासूनच अभिनय क्षेत्रात पाऊल टाकले होते. फितूर या चित्रपटात ती बालकलाकार म्हणून झळकली होती. कहाणी, चक्रवर्ती सम्राट अशोक, इंटरनेट वाला लव्ह अशा चित्रपट आणि मालिकांमधून तिला महत्वाच्या भूमिका मिळत गेल्या. अली बाबा या मालिकेत ती शिजान खान सोबत स्क्रीन शेअर करत होती. मालिकेत काम करत असताना तुनीषाचे शिजान सोबत सूर जुळून आले अशी माहिती समोर येत आहे. याप्रकरणी तपासाने वेग घेतला असून शिजानची सखोल चौकशी केली जात आहे.