सुंदरा मनामध्ये भरली मालिकेत या सुंदर अभिनेत्रीची एन्ट्री

गेल्या काही दिवसांत मालिकांमध्ये नव्या कलाकारांच्या एन्ट्रीचा फंडा जोरात सुरू आहे. मालिकेत जर संथपणा आला असेल तर तो नव्या पात्राच्या एन्ट्रीमुळे कमी होत असल्याचं लक्षात आल्यामुळे आजकाल अनेक मालिकांमध्ये सुरू असलेल्या कथेत नवं पात्र दाखल होत आहे. प्रेक्षकांनाही मालिकेतील हा बदल कधी आवडतो तर कधी प्रेक्षकांची पसंती मिळत नाही. पण हा फंडा मात्र सध्या वापरला जातो हे खरं. अभिमन्यू आणि लतिका यांच्या प्रेमाची गोष्ट असलेल्या सुंदरा मनामध्ये भरली मालिकेत सध्या रंजक वळण आलं आहे. अभिनेत्री आणि गायिका अशी ओळख असलेली स्वानंदी टिकेकर लवकरच सुंदरा मनामध्ये भरली या मालिकेत दिसणार आहे.

स्वानंदी कोणत्या भूमिकेत पहायला मिळणार याची मालिकेच्या प्रेक्षकांनाही उत्सुकता लागली आहे. समाजातील वजनाने जास्त असलेल्या मुलींना नेहमी लग्नासाठी नकार दिला जातो. वजनाने जाड असलेली मुलगी आणि फिटनेसप्रेमी असलेला मुलगा यांचं लग्नं झालं, तर त्यांच्यातील प्रेम कसं फुलेल या लव्हट्रॅकवर सुंदरा मनामध्ये भरली ही मालिका सुरू झाली. पण सौंदर्य हे दिसण्यात नव्हे तर असण्यात पहावं हा संदेश देणारी ही मालिका टीव्हीविश्वात लोकप्रिय ठरली. सध्या ही मालिका रंजक वळणावर आली आहे आणि याच वळणावर अभिनेत्री स्वानंदी टिकेकर हीची या मालिकेत एन्ट्री होणार आहे. बऱ्याच दिवसांनी स्वानंदीला अभिनय करताना पाहण्याची पर्वणी तिच्या चाहत्यांना मिळणार आहे. 

या मालिकेतील अभिमन्यू आणि लतिका ही जोडी प्रेक्षकांना खूपच आवडत आहे. सुंदरा मनामध्ये भरली या मालिकेत अभिलाषा ही भूमिका करणाऱ्या राधा सागर हिने नुकतीच मालिकेतून एक्झिट घेतली आहे. आता स्वानंदी या मालिकेत येणार या बातमीने मालिकेला नवं वळण येण्याची शक्यता आहे. दिल दोस्ती दुनियादारी या मालिकेत स्वानंदीने साकारलेली बिनधास्त मुलगी सर्वांनाच आवडली. त्यानंतर या मालिकेच्या दुसऱ्या सीझनमध्ये ती दिसली. खरंतर ज्येष्ठ अभिनेते उदय टिकेकर हे स्वानंदीचे वडील आहेत आणि त्यांच्याकडून तिला अभिनयाचा वारसा मिळाला आहे. तर आई गायिका आरती अंकलीकर टिकेकर यांच्याकडून स्वानंदीला सुरांचा वारसा मिळाला आहे.

विशेष म्हणजे स्वानंदी अभिनेत्रीबरोबर उत्तम गायिकाही आहे. सिंगिंग स्टार या रिऍलिटी शोची स्वानंदी विजेती झाली होती. त्यानंतर ती अस्सं सासर नको ग बाई या मालिकेत नायिकेच्या रूपात दिसली मात्र ही मालिका फार दिवस टिकली नाही. काही दिवसांपूर्वी मालिकेची नायिका अक्षया नाईक हिला अपघात झाल्याने मालिकेच्या कथेत काही बदल केले होते. त्यानंतर आता स्वानंदीच्या येण्याने मालिका कोणता टर्न घेणार हे पाहणं रंजक ठरणार आहे. तूर्तास स्वानंदी या मालिकेतील भूमिकेसाठी तयारी करत असून लवकरच ती ऑनस्क्रिन दिसेल.