समंथा रूथ प्रभूचा सेटवर अपघात.. अगोदर आजारपण आणि आता दुखापतीमुळे चाहते चिंतेत

प्रसिद्ध अभिनेत्री समंथा रुथ प्रभू सध्या वरुण धवन सोबत ऍक्शन थ्रिलर वेब सीरिज सिटाडेलमध्ये दिसणार आहे. तिने तिच्या इन्स्टाग्राम स्टोरीवर जखम झालेल्या हातांचा फोटो शेअर केला आहे. फोटो शेअर करताना तिने कॅप्शनमध्ये “कामाचा मोबदला” असं आवर्जून लिहिलं आहे. सेटवर ऍक्शन सिन करत असताना समंथाच्या हाताला मोठी दुखापत झाली. दुखापत झालेला फोटो समंथाने शेअर करताच चाहत्यांनी तिला काळजी घेण्याचा सल्ला दिला आहे. समंथा रुथ प्रभू सध्या तिच्या आगामी प्रोजेक्ट्सपासून ते खराब झालेल्या तब्येतीपर्यंत बर्‍याच कठीण प्रसंगातून सामोरी जात आहेत.

गेल्या वर्षाच्या अखेरीस मायोसिटिसचा सामना करताना तिच्या संघर्षाबद्दल तिने खुलासा केला होता. हा आजार बरा होतो न होतो तोच तिला आणखी एका संकटाला सामोरे जावे लागत आहे. सामंथा आपल्या आगामी प्रोजेक्टसाठी स्टंट परफॉर्मर आणि ऍक्शन डायरेक्टर यानिक बेनसोबत ऍक्शन सीक्वेन्स सराव करताना दिसली. यानिकने सर्व प्रकारची खबरदारी घेऊन स्टंट शिकवले होते. एक्शन कोरिओग्राफी करताना समंथा खूप फोकस असते आणि डेडिकेशनने सिन पूर्ण करते असे यानिकने अधोरेखित केले होते. समंथा नैनितालमध्ये ऍक्शन शूटची तयारी करत होती. काही दिवसांपूर्वी तिने घोडेस्वारी करतानाचा फोटोही शेअर केला होता. असे स्टंट करत असताना सेटवरच समंथाला दुखापत झाली. राज आणि डीके यांनी तयार केलेले सिटाडेल हे आंतरराष्ट्रीय मालिकेचे भारतीय रूपांतर आहे.

सिटाडेल मूळतः रुसो ब्रदर्सने तयार केले आहे. या सिरीजमध्ये वरुण धवनसोबत सामंथा दिसणार आहे. प्रियांका चोप्रा, रिचर्ड मॅडन आणि स्टॅनली टुसी सिरीजमध्ये प्रमुख भूमिकेत आहेत. सामंथा तेलुगू ऍक्शन थ्रिलर यशोदामध्ये शेवटची पडद्यावर दिसली होती. यशोदा चित्रपटात, सामंथाने एका सरोगेट आईची भूमिका केली होती. आई आपल्या मुलाचे संरक्षण करण्यासाठी संकटांचा सामना करते. हा चित्रपट बॉक्सऑफिसवर हिट ठरला. शाकुंतलम हा तिचा बहुप्रतिक्षित चित्रपट १४ एप्रिल २०२३ रोजी रिलीज होणार आहे. मात्र सध्या चालू असलेल्या प्रोजेक्टसाठी काळजी घेण्याचा सल्ला चाहत्यांकडून देण्यात येत आहे. आजारपण आणि आता सेटवर झालेला अपघात यातून ती सुखरूप बाहेर पडो अशी प्रार्थना तिच्यासाठी करण्यात येत आहे.