स्टार प्रवाह वाहिनीवर नवीन मालिका.. रेश्मा शिंदेसह सुचित्रा बांदेकर छोट्या पडद्यावर

स्टार प्रवाह वाहिनी ही टीआरपीच्या स्पर्धेत अव्वल असलेली वाहिनी ठरली आहे. या वाहिनीच्या बहुतेक सर्वच मालिका टॉप दहाच्या यादीत आपले स्थान टिकवून ठेवून आहेत. त्यात आता लवकरच एका नवीन मालिकेची भर पडणार आहे. घरोघरी मातीच्या चुली ही नवीन मालिका स्टार प्रवाह वाहिनीवर दाखल होत आहे. या मालिकेत रेश्मा शिंदे पुन्हा एकदा प्रमुख भूमिकेत झळकताना दिसणार आहे. रंग माझा वेगळा या मालिकेनंतर रेश्मा पुन्हा एकदा स्टार प्रवाह वाहिनीवर दाखल होत आहे. घरोघरी मातीच्या चुली या मालिकेचा प्रोमो नुकताच प्रेक्षकांच्या भेटीला आला आहे. यात रेश्मा हातात धूप घेऊन घरभर फिरताना दिसत आहे.

ही मालिका त्यावरून कहाणी घर घर की या मालिकेशी मिळती जुळती असावी असा अंदाज बांधला जात आहे. घरोघरी मातीच्या चुली या मालिकेचा प्रोमो सुचित्रा बांदेकर यांनीही शेअर केला आहे. त्यामुळे सुचित्रा बांदेकर या मालिकेचा भाग असणार का अशी चर्चा सुरू झाली आहे. सुचित्रा बांदेकर यांनी छोट्या पडद्यावर पुन्हा एन्ट्री करावी अशी त्यांच्या चाहत्यांची इच्छा आहे. पण गेल्या काही दिवसांपासून त्या निर्मिती क्षेत्राकडे वळलेल्या पाहायला मिळाल्या. ठरलं तर मग ही त्यांचीच निर्मिती असलेली टॉपची मालिका आहे. त्यामुळे त्या घरोघरी मातीच्या चुली या मालिकेच्याही निर्मात्या असणार की मालिकेत एखादी भूमिका साकारणार हे येत्या काही दिवसातच स्पष्ट होईल. दरम्यान या नवीन मालिकेच्या एंट्रीमुळे जुन्या मालिकेला डच्चू देण्यात येणार आहे.

मुरांबा ही मालिका गेल्या काही दिवसांपासून डळमळीत झालेली पाहायला मिळत आहे. रमा आणि अक्षयचा सुखी संसार लवकरात लवकर पाहायला मिळावा अशी प्रेक्षकांची अपेक्षा आहे. त्यामुळे स्टार प्रवाह वाहिनी मुरांबा मालिकेचा लवकरच गाशा गुंडाळणार असे बोलले जात आहे. दरम्यान घरोघरी मातीच्या चुली या मालिकेला भली मोठी स्टार कास्ट लाभणार आहे. त्यामुळे मालिकेत आणखी कोणकोणत्या कलाकारांना अभिनयाची संधी मिळणार याचीही उत्सुकता लागून राहिली आहे. मालिकेच्या प्रसारणाची वेळ आणि त्यातील कलाकारांची नावं येत्या काही दिवसात समोर येतील. तूर्तास रेश्मा शिंदे पुन्हा एकदा प्रमुख भूमिका साकारणार म्हणून कलाकारांनी तिचे अभिनंदन करण्यास सुरुवात केली आहे.