रंजना यांच्या ​जीवनपटावरील भूमिकेत दिसणार ही प्रसिद्ध अभिनेत्री

रंजना अनफोल्ड या चित्रपटातून सर्वांची लाडकी नायिका दिवंगत अभिनेत्री रंजना देशमुख यांचा जीवनप्रवास उलगडणार आहे. सुपरस्टार रंजनाच्या स्मृतिदिनी म्हणजेच पुढच्या वर्षी ३ मार्च २०२३ रोजी रंजना अनफोल्ड हा चित्रपट प्रेक्षकांच्या भेटीला येईल असे जाहीर करण्यात आले आहे. कार्निव्हल मोशन पिक्चर्स प्रॉडक्शन अंतर्गत डॉ श्रीकांत भासी प्रस्तुत रंजना अनफोल्ड या चित्रपटाची निर्मिती वैशाली सरवणकर यांची आहे. चित्रपटाचे दिग्दर्शन अभिजित मोहन वारंग करणार आहेत. चित्रपटाचे लेखन स्वतः अभिजित मोहन वारंग यांनी केले आहे.

चित्रपटात लाडक्या रंजनाचा जीवनप्रवास उलगडणार असल्याने चित्रपटाची घोषणा होताच प्रेक्षक देखील खूपच खुश झालेले आहेत. चित्रपटाच्या निमित्ताने आयोजकांनी मंगळागौर स्पर्धा, इको फ्रेंडली गणपती स्पर्धा तसेच रंजना संबंधित असलेल्या विषयावर रांगोळी स्पर्धा असे विविध उपक्रम राबवलेले पाहायला मिळाले. त्यामुळे हा चित्रपट प्रदर्शन अगोदरच चर्चेत राहिलेला आहे. रंजना अनफोल्ड या चित्रपटात रंजनाची भूमिका कोण निभावणार हे जरी गुलदस्त्यात ठेवले होते. या नावाचा उलगडा आता झालेला पाहायला मिळतो आहे. खरं तर रंजनाची भूमिका साकारण्यासाठी तेवढ्याच ताकदीच्या अभिनेत्रीची आवश्यकता आहे. त्यासाठी नेटकऱ्यांनी अनेक अभिनेत्रींची नावे सुचवली होती.

प्राजक्ता माळी, सायली संजीव ते नम्रता संभेराव ही भूमिका उत्तम निभावू शकेल असा विश्वास चाहत्यांनी व्यक्त केला होता. मात्र आता आणखी एक तगडी नायिका या भूमिकेसाठी योग्य असल्याचे समोर आले आहे. मृण्मयी देशपांडे हिने काही दिवसांपूर्वी नवीन गेटअप मधला एक व्हिडीओ शेअर केला होता. नवीन सुरुवात नवीन भूमिका असे कॅप्शन त्याला दिले होते. या गेटअपमध्ये मृण्मयी रंजनाच्या चेहऱ्याशी मिळतीजुळती वाटली. त्यामुळे अनेकांनी तिच्या या व्हिडिओवर रंजनाची भूमिका करत असल्याचे सांगितले. तर अनेकांनी ऐतिहासिक भूमिका करणार असल्याचे म्हटले. मात्र मृण्मयीच रंजनाच्या भूमिकेसाठी योग्य असल्याचे म्हणणे आता प्रेक्षकांनी मांडले आहे.

त्यामुळे मृण्मयीच या चित्रपटात रंजनाची भूमिका साकारणार असल्याचे दिसून येणार आहे. अर्थात हा प्रेक्षकांनी लावलेला एक तर्क जरी असला तरी येत्या काही दिवसातच याचे स्पष्टीकरण तुम्हाला मिळणार आहे. रंजनाच्या भूमिकेला मृण्मयी योग्य न्याय देऊ शकेल असा विश्वास काही जाणकार प्रेक्षक व्यक्त करत आहेत. आपल्या लाडक्या अष्टपैलू अभिनेत्रीचा जीवनपट पाहण्यासाठी प्रेक्षक देखील नक्कीच उत्सुक आहेत. त्यामुळे या चित्रपटाचे अपडेट प्रेक्षकांना वेळोवेळी मिळत राहतीलच. तूर्तास चित्रपटाच्या प्रदर्शनाची आतुरता तमाम रसिक प्रेक्षकांना आतापासूनच लागून राहिली आहे. पण त्यासाठी आणखी थोडीशी वाट पहावी लागणार आहे.