झी मराठीची नवी मालिका सुरू होण्याआधीच अन्नपूर्णा यांनी सोडली मालिका.. हे आहे कारण

झी मराठी वाहिनीवर नव्या मालिकांचा बोलबाला पाहायला मिळतो आहे. ‘तू चाल पुढं’ ही नवीन मालिका १५ ऑगस्ट २०२२ पासून म्हणजेच उद्यापासून संध्याकाळी ७.३० वाजता प्रसारित केली जात आहे. दीपा परब या मालिकेत प्रमुख भूमिका साकारत आहे. अश्विनी वाघमारे या सर्वसामान्य गृहिणीची कहाणी प्रेक्षकांच्या भेटीला आणत आहे. मात्र मालिका सुरू होण्याअगोदरच या मालिकेतील अन्नपूर्णा विठ्ठल यांनी ही मालिका सोडली असल्याचे दिसून येत आहे. काही दिवसांपूर्वीच  मालिकेचा पहिला प्रोमो प्रेक्षकांच्या भेटीला आला होता. त्यावेळी आदित्य वैद्य, धनश्री कडगावकर, देवेंद्र दोडके, वैष्णवी कल्याणकर आणि अन्नपूर्णा विठ्ठल हे कलाकार या प्रोमोमधून प्रेक्षकांच्या समोर आले होते.

मात्र आता अन्नपूर्णा विठ्ठल या मालिकेचा भाग नसणार हे स्पष्ट झाले आहे. स्टार प्रवाहवरील सहकुटुंब सहपरिवार या मालिकेत अन्नपूर्णा विठ्ठल आईच्या भूमिकेत होत्या. परंतु सेटवर मिळत असलेली अपमानास्पद वागणूक आणि सह कलाकारांकडून वारंवार होणारा अपमान त्यांना सहन झाला नसल्याने त्यांनी ती मालिका सोडण्याचा निर्णय घेतला होता. मालिकेच्या सहकलाकार आणि दिग्दर्शकाविरोधात त्यांनी मानसिक छळ केल्याचे आरोप लावले होते. त्यावेळी त्यांनी रीतसर तक्रार देखील नोंदवली होती. या गोष्टीला काही महिने उलटते न उलटते तोच, आता त्या झी मराठी वरील तू चाल पुढं या मालिकेतून झळकणार असल्याने त्यांच्या चाहत्यांनी आनंद व्यक्त केला होता.

परंतु अन्नपूर्णा विठ्ठल आता या मालिकेचा भाग नसणार आहेत. त्यांच्या जागी या मालिकेत प्रतिभा गोरेगावकर झळकणार आहेत. अन्नपूर्णा विठ्ठल यांनी झी मराठीची मालिका का सोडली? असा प्रश्न अनेकांना पडला असेल. त्याचे कारण नुकतेच समोर आले असून अन्नपूर्णा विठ्ठल यांना आणखी एक नवा प्रोजेक्ट मिळाला आहे. सोनी सब या हिंदी वाहिनीवरील ‘अलीबाबा’ या नव्या मालिकेत त्यांची वर्णी लागली आहे. या मालिकेच्या गेटअप मधला एक फोटोला हटके कॅप्शन देऊन त्यातून त्यांनी एक सूचक विधान केलेले पाहायला मिळत आहे. ‘कुछ लोग तुम्हारी कामयाबी की राह में हमेशा पत्थर फेकेंगे.

अब ये तुम्हारे उपर निर्भर करता है तुम ऊन पत्थरों से क्या बनाते हो. मुश्किलों की दिवार या कामयाबी का पूल’. तूर्तास अन्नपूर्णा यांनी तू चाल पुढं या मालिकेतून काढता पाय घेतला आहे. त्यांच्या जागी प्रतिभा गोरेगावकर यांना अश्विनीची सासू म्हणजेच उज्वला वाघमारे हिची भूमिका साकारण्याची संधी मिळाली आहे. प्रतिभा गोरेगावकर यांनी हिंदी मराठी मालिकेतून काम केले आहे. अग्गबाई सासूबाई या मालिकेत त्यांनी सुलभा काकूंची भूमिका साकारली होती. झुंज तुझी माझी, एक थी बेगम, साथ निभाना साथीया अशा मालिकांमधून त्यांनी महत्वाच्या भूमिका साकारल्या आहे.