माझी तुझी रेशीमगाठ मालिकेतील परीचे हिंदी सृष्टीत पदार्पण..

माझी तुझी रेशीमगाठ या मालिकेतली परी म्हणजेच बालकलाकार मायरा वायकुळ आता लवकरच हिंदी मालिकेतून झळकताना दिसणार आहे. मायराने तिच्या निरागस अभिनयाने प्रेक्षकांची मनं जिंकून घेतली होती. आता ती पुन्हा एकदा प्रमुख भूमिकेतून प्रेक्षकांच्या भेटीला येणार आहे. कलर्स हिंदी वाहिनीवर ‘नीरजा’ एक नई पहचान या नावाची नवीन मालिका सुरू होत आहे. यात मायरा वायकुळ नीरजाची प्रमुख भूमिका साकारत आहे. तर तिची आई म्हणजेच प्रोतिमाची भूमिका स्नेहा वाघ निभावणार आहे. नीरजा ही लहानशी मुलगी आहे. तिला इतरांप्रमाणे खेळायचंय, बागडायचंय मात्र भूतकाळातील काही गोष्टींमुळे तिची आई तिला या सर्वापासून दूर ठेवू पाहत आहे.

निरजाला एक वेगळी ओळख द्यावी म्हणून तिची आई तसा प्रयत्न करताना दिसते. मालिकेचा हा प्रोमो नुकताच प्रेक्षकांच्या भेटीला आलेला आहे. हा प्रोमो पाहून ही मालिका शक्ती मालिकेच्या कथानकाशी मिळते जुळते आहे का असा प्रश्न उपस्थित केला जात आहे. तर काहींचे म्हणणे आहे की नीरजा ही देहविक्री करणाऱ्याची मुलगी आहे. त्यामुळे गंगुबाई काठियावाडी या चित्रपटाशी हे मालिकेचे कथानक जोडले जात आहे. अर्थात प्रेक्षकांचे हे अंदाज खरे ठरतील की नाही यावर काही दिवसातच उत्तर स्पष्ट होईल. पण या मालिकेत प्रसिद्ध अभिनेत्री काम्या पंजाबी हिची देखील प्रमुख भूमिका असणार आहे. काम्या तिच्या बिनधास्तपणाने आणि सहजसुंदर अभिनयाने ओळखली जाते. या मालिकेत तिची दमदार भूमिका असणार हे ठरलेले आहे.

नीरजा मालिकेची उत्सुकता हिंदी भाषिक प्रेक्षकांसह आता मराठी भाषिक प्रेक्षकांना देखील लागलेली आहे. माझी तुझी रेशीमगाठ या मालिकेनंतर मायराने गजर कीर्तनाचा या शोमध्ये सूत्रसंचालन केले होते. शिवाय लवकरच ती चला हवा येऊ द्या या शोमध्येही दिसणार आहे. चला हवा येऊ द्या मध्ये सेलिब्रिटी सिजन करण्यात आले, त्यात आता चिमुरड्यांची धमाल रंगणार आहे. मालिका सृष्टीतील बालकलाकार चला हवा येऊ द्याच्या मंचावरून प्रेक्षकांना हसवण्याचा प्रयत्न करणार आहेत. त्यात मायरा देखील झळकणार असल्याचे प्रोमोमध्ये दिसून आले होते. त्यामुळे एकाचवेळी मायरा हिंदी मालिकेतून आणि चला हवा येऊ द्या शोमधून प्रेक्षकांच्या भेटीला येत आहे. या दोन्ही प्रोजेक्टसाठी मायरा वायकुळचे अभिनंदन.