​मन उडू उडू झालं मालिकेतील मुक्ताबद्दल बरंच काही.. झी मराठीच्या कलाकारासोबत झालंय लग्न

मन उडू उडू झालं या झी मराठी वाहिनीवरील मालिकेत दिपू आणि इंद्राची जोडी प्रेक्षकांच्या विशेष पसंतीस उतरली आहे. दिपू इंद्राला आपल्या प्रेमाची कबुली कधी देणार याची उत्सुकता असली तरी, खऱ्या आयुष्यात मात्र हृता दुर्गुळे हिने प्रतीक शाह याला आपल्या प्रेमाची कबुली देऊन अनेक तरुणांची मनं दुखावली आहेत. मालिकेतील हृता दुर्गुळे, अजिंक्य राऊत, शर्वरी कुलकर्णी, पूर्णिमा तळवलकर, अरुण नलावडे, रुपलक्ष्मी शिंदे, रीना अगरवाल, ऋतुराज फडके आणि प्राजक्ता परब यांच्या महत्वाच्या भूमिका आहेत.

मालिकेत मुक्ताची भूमिका अभिनेत्री प्राजक्ता परब हिने निभावली आहे तिच्याबद्दल माहीत नसलेल्या काही खास गोष्टी जाणून घेऊयात. प्राजक्ता परब ही मराठी मालिका अभिनेत्री आहे. मालिकेत येण्याअगोदर प्राजक्ता मुंबईत पंचतारांकित हॉटेलमध्ये नोकरी करत होती. त्यावेळी अनेक दिग्गज कलाकारांना तिला भेटण्याची संधी मिळाली होती. यातूनच तिची रजनीकांत, नाना पाटेकर यांच्याशी चांगली ओळख झाली. याचा परिणाम असा झाला की प्रजक्ताने गलेलठ्ठ पगाराची नोकरी सोडून अभिनय क्षेत्रात येण्याचं धाडस दाखवलं. घरातून तशी परवानगी मिळाल्यावर काही जाहिरातीतून तिला काम मिळालं. सेंटर फ्रेश, एंगेज डिओ अशा जाहिरातीतून चमकत असताना प्राजक्ताने आपली पाऊले मालिका सृष्टीकडे वळवली. स्टार प्रवाहवरील ललित २०५, झी युवा वरील ऑल मोस्ट सुफळ संपूर्ण या मालिकेतून प्राजक्ताने महत्वाच्या भूमिका निभावल्या. मन उडू उडू झालं या मालिकेतून मुक्ताची भूमिका ती साकारत आहे. कॉलेज गर्ल आणि इंद्राची लाडकी बहीण अशी ही मुक्ता प्राजक्ताने सुरेख साकारलेली पाहायला मिळते आहे.

प्राजक्ताचा नवरा अंकुश मरोडे हा देखील मराठी सृष्टीत कार्यरत आहे. ९ जानेवारी २०२१ रोजी प्राजक्ता परब आणि अंकुश मरोडे विवाहबद्ध झाले. हिंदी मालिकांमध्ये अंकुशने असिस्टंट डायरेक्टर म्हणून काम केले होते. एक घर मंतरलेलं या झी युवा वरील हॉरर मालिकेचे त्याने दिग्दर्शन केले आहे. माझ्या नवऱ्याची बायको या मालिकेच्या काही भागांचे देखील त्याने दिग्दर्शन केले आहे. झी मराठी वाहिनीरील ती परत आलीये ही लोकप्रिय मालिकाही त्याने दिग्दर्शित केली आहे. त्यामुळे प्राजक्ता आणि अंकुश हे दोघेही आता मराठी सृष्टीत स्वतःची ओळख बनवताना दिसत आहेत. माझ्या मित्राची गर्लफ्रेंड या वेबिसोडमध्ये प्राजक्ता आणि अंकुश एकत्र काम करत होते. यातूनच दोघांच्या प्रेमाचे सूर जुळून आले आणि त्या दोघांनी लग्न करण्याचा निर्णय घेतला. मन उडू उडू झालं मालिकेत प्राजक्ताने साकारलेली मुक्ता प्रेक्षकांना देखील भावली आहे या भूमिकेसाठी प्राजक्ता परब हिला मनःपूर्वक शुभेच्छा..