सुख म्हणजे नक्की काय असतं मालिकेत रंजक वळण.. जयदीप दिसणार नव्या भूमिकेत

सुख म्हणचे नक्की काय असतं या मालिकेत आणखी एक नवीन ट्विस्ट आला आहे. शालिनीच्या त्रासापासून लवकरच गौरीची सुटका होणार असल्याने मालिकेला रंजक वळण मिळणार आहे. शालिनीच्या इशाऱ्यावर राहुल गौरीला सतत त्रास देत आहे. जयदीपच्या अनुपस्थितीत गौरी हा सगळा त्रास निमूटपणे सहन करत आली आहे. ह्या गोष्टी आता जयदीपला उलगडल्या असल्याने, तो वेगळे रूप धारण करून शालिनी आणि राहुलला धडा शिकवणार आहे. सुख म्हणजे नक्की काय असतं मालिकेत जयदीप आपल्या मुलीला घेऊन गौरीपासून दूर निघून गेला होता. मात्र आपली मुलगी आणि जयदीप सुखरूप असतील असा विश्वास गौरीला होता.

या दोघांच्या प्रतीक्षेत गौरी शालीनीने केलेला अत्याचार सहन करत राहिली. इकडे मात्र जयदीप लक्ष्मी सोबत सुखाने दिवस घालवत होता. मात्र आपल्या लेकीच्या एका ट्रिपमुळे तो पुन्हा गौरीला भेटला. मात्र आता राहुल आणि शालिनी दोघे मिळून गौरीला त्रास देत असल्याचे त्याच्या लक्षात आले. त्याचमुळे जयदीप एका व्यक्तीचे रूप बदलून शिर्के पाटील कुटुंबात पुन्हा दाखल झाला आहे. इथे येऊन तो गौरीला त्यांच्या जाचापासून वाचवताना दिसणार आहे. जयदीपचे हे रूप शालिनी ओळखणार का? हे येत्या काही दिवसातच स्पष्ट होईल. मात्र जयदीपच्या रूप बदलण्याने मालिकेला निश्चित असे वळण मिळाले आहे. सुख म्हणजे नक्की काय असतं मालिका ऑगस्ट २०२० पासून प्रेक्षकांचे मनोरंजन करत असून प्रेक्षकांकडून आजवर खूप चांगला प्रतिसाद मिळवला आहे.

सुरुवातीला मालिकेने टीआरपीच्या स्पर्धेत पहिला क्रमांक पटकावला होता. आजही ही मालिका टॉप ७ च्या यादीत आपले स्थान निश्चित करताना दिसली आहे. मालिकेच्या आताच्या रंजक वळणातूनच गौरी आणि जयदीप पुन्हा एकत्र येतील आणि आपला संसार पुन्हा एकदा थाटतील अशी आशा प्रेक्षकांनी व्यक्त केली आहे. सुख म्हणजे नक्की काय असतं मालिकेत आजवर वेगवेगळे चढउतार पाहायला मिळाले. जयदीपने तर या मालिकेत जवळपास चार लग्न केली आहेत, तर गौरी सुद्धा लवकरच चार लग्न करण्याचा मार्गावर आहे. त्यामुळे मालिकेने आता कुठेतरी थांबावे अशी अपेक्षा प्रेक्षक व्यक्त करत आहेत. जयदीप आता पुन्हा गौरीकडे परतल्याने प्रेक्षकांच्या या अशा पल्लवित झाल्या आहेत. एका सुखद क्षणी मालिकेने निरोप घ्यावा अशी विनंती आता प्रेक्षक करत आहेत.