आदीवी शेष आणि सई मांजरेकरच्या मेजरची जादू.. अवघ्या दोन दिवसांत कमावला एवढ्या कोटींचा गल्ला

३ जून २०२२ रोजी ‘मेजर’ हा बहुप्रतिक्षित चित्रपट प्रदर्शित झाला. हा चित्रपट तेलगू, मल्याळम आणि हिंदी अशा तीन  भाषेत रिलीज करण्यात आला आहे. या चित्रपटाचा ट्रेलर लॉन्च करण्यात आला त्याचवेळी या चित्रपटाची उत्सुकता प्रेक्षकांच्या मनात निर्माण झाली होती. मेजर हा चित्रपट मुंबई हल्ल्यावर आधारित आहे. २००८ सालच्या मुंबई अटॅकमध्ये मेजर संदीप उन्नीकृष्णन शहिद झाले होते. त्यांच्या जीवनावर मेजर हा बायोपिक बनवण्यात आला आहे. दाक्षिणात्य अभिनेते आणि दिग्दर्शक असलेले आदीवी शेष मेजर संदीप यांची भूमिका साकारत आहेत. तर सई मांजरेकर त्यांच्यासोबत प्रमुख भूमिकेत दिसत आहे.

दाक्षिणात्य सुपरस्टार माहेशबाबू यांच्या निर्मिती संस्थेतून हा चित्रपट निर्मित केला आहे. प्रदर्शनाच्या पहिल्याच दिवशी मेजर चित्रपटाला प्रेक्षकांचा भरघोस प्रतिसाद मिळाला. बॉक्सऑफिसवर या चित्रपटाने धुमाकूळ घातलेला पाहायला मिळतो आहे. पहिल्या दिवशी मेजर चित्रपटाने १३.४ कोटींचा गल्ला आपल्या खात्यात जमवला आहे. चित्रपटाला जगभरातून १४६० स्क्रीनिंग मिळाल्या होत्या. दुसऱ्या दिवशी चित्रपटाला चांगला प्रतिसाद मिळाला असून या चित्रपटात अवघ्या दोन दिवसात जवळपास २३ कोटींचा पल्ला गाठला आहे. चित्रपट बनवण्यासाठी ३० कोटींचा खर्च करण्यात आला. हा चित्रपट पुढील काही दिवसात चांगली कमाई करणार अशी आशा आहे.

आदीवी शेष ने साकारलेले मेजर संदीप उन्नीकृष्णन प्रेक्षकांची मने जिंकून घेत आहे. स्वतः आलू अर्जुनने देखील चित्रपटाच्या टीमचे आणि आदीवीचे कौतुक करत त्याला मन ऑफ द शो म्हटले आहे. मुंबईत राष्ट्रीय सुरक्षा गार्ड साठी या चित्रपटाचे स्पेशल स्क्रिनिंग ठेवण्यात आले होते. ३१२ कामांडोने आपल्या कुटुंबासोबत मिळून हा चित्रपट पाहण्याचा आनंद घेतला होता. हे स्पेशल स्क्रिनिंग आदीवीसाठी खूपच खास ठरले. यावेळी ब्लॅक कॅट कमांडोने आदीविला मेडल देऊन सन्मानित केले होते. माझ्यासाठी हे मेडल ऑस्करपेक्षाही मोठे आहे अशा भावना आदिविने यावेळी व्यक्त केल्या होत्या.

महाराष्ट्राची हास्यजत्रा या शोमध्ये चित्रपटाची टीम प्रमोशन करण्यासाठी दाखल झाली होती तेव्हा मेधा मांजरेकर, सई मांजरेकर आणि आदीवी शेष यांनी हजेरी लावलेली पाहायला मिळाली. आदीवी प्रमाणे सई मांजरेकर हिच्यासाठी देखील हा चित्रपट खूप खास आहे. या चित्रपटातून सई दाक्षिणात्य चित्रपट सृष्टीत नशीब आजमावू पाहत आहे. देशासाठी जीवाची बाजी लावणाऱ्या पतीसाठी एक प्रेमळ पत्नीची तिची भूमिका प्रेक्षकांना खूपच भावली आहे. या चित्रपटातील दोघांच्याही भूमिकेचे रसिक प्रेक्षकांकडून खूप कौतुक होत आहे.