दीपा आणि कार्तिकच्या जुळून आलेल्या संसारात पुन्हा उठणार वादळ.. ट्विस्ट पाहून प्रेक्षकांचा हिरमोड

स्टार प्रवाहवरील मालिकांचा टीआरपीचा आलेख हा गेल्या काही वर्षांपासून सतत चढताच ठरला आहे. त्यातील आई कुठे काय करते आणि रंग माझा वेगळा या दोन मालिका प्रेक्षकांच्या मनाचा ठाव घेताना दिसल्या आहेत. या दोन्ही मालिकांवर प्रेक्षकांनी प्रचंड प्रेम दाखवले आणि म्हणूनच या दोन्ही मालिकेतील येणारे ट्विस्ट प्रेक्षकांनी आपलेसे केले. मात्र कधीतरी अशा टीआरपीचा कडेलोट होणे गरजेचे असते. कारण सततचे ट्विस्ट पाहून मालिकेचे कथानक भरकटत गेले की त्या मालिकेचा रस निघून चोथा उरतो. परिणामी प्रेक्षकांचा देखील हिरमोड होतो. रंग माझा वेगळा या मालिकेत गेल्या काही दिवसांपासून सकारात्मक बदल दाखवले.

दीपा आणि कार्तिकची मनं देखील जुळून येऊ लागली. आपल्या दोन्ही मुलींनी शाळेत मिळवलेलं यश पाहून हे दोघेही एकमेकांची स्तुती करताना दिसले. आता हे दोघे एकत्र येणार अशी आशा असतानाच मालिकेत पुन्हा एक धक्कादायक ट्विस्ट दाखवण्याचा घाट घालण्याचा प्रयत्न केला जात आहे. दीपा आणि कार्तिकच्या जुळून येत असलेल्या संसारात आता सुजय नावाचे वादळ येत आहे. रंग माझा वेगळा या मालिकेचा नवीन प्रोमो नुकताच प्रेक्षकांच्या भेटीला आला आहे. या प्रोमोमध्ये एक ट्विस्ट आणल्याने प्रेक्षकांनी प्रचंड नाराजी दर्शवली आहे. दीपा आणि कार्तिक तुळशीच्या लग्नावेळी एकत्र येतात तिथेच सुजय येऊन दिपाला आणि आपल्या दोन्ही मुलींना घरी न्यायला येतो. या ट्विस्टमुळे दीपा गोंधळून जाते तर कार्तिक संशयाच्या विळख्यात अडकताना दिसतो.

कार्तिकला दिपाबाबत संशय येतो आणि या दोन्ही मुली सुजयच्या आहेत असा तो गैरसमज करून घेतो. मालिकेत पुन्हा एकदा अभिनेता निखिल राजेशिर्केची एन्ट्री होत आहे. बिग बॉसच्या घरातून बाहेर पडल्यानंतर निखिलला पुन्हा एकदा मालिकेत झळकण्याची संधी मिळाली आहे. याअगोदर तो माझी तुझी रेशीमगाठ या मालिकेत विरोधी भूमिका साकारताना दिसला होता. सुजयच्या येण्याने मालिकेचा हा ट्विस्ट मात्र प्रेक्षकांचा अंत पाहणारा ठरला आहे. इथे लेखकाच्या विचारांचा हेवा नाही तर त्याची कीव करावीशी वाटते असा ट्विस्ट त्यांनी या मालिकेला दिला आहे. त्यामुळे प्रेक्षकांनी प्रचंड नाराजी दर्शवली आहे. या मालिकेने ऑक्टोबर २०१९ पासून म्हणजेच जवळपास ३ वर्षे प्रेक्षकांच्या मनावर अधिराज्य गाजवले आहे.

याअगोदर प्रेक्षकांनी मालिकेचा प्रत्येक ट्विस्ट आपुलकीने स्वीकारला. आता दीपा आणि कार्तिकचा संसार पुन्हा एकदा फुलू लागलेला पाहायला मिळताच या ट्विस्टमुळे  प्रेक्षकांनी मालिकेवर नाराजी दर्शवली आहे. गेल्या वर्षभरापासून ही मालिका नंबर एकचे स्थान पटकावताना दिसली होती. सकारात्मक निर्णयावर येऊन मालिकेने प्रेक्षकांचा निरोप घेणे अपेक्षित असताना आता हा आणखी एक ट्विस्ट कशासाठी? असा प्रश्न आता प्रेक्षकांनी उपस्थित केला आहे. त्यामुळे लवकरात लवकर ही मालिका संपवावी अशी मागणी या नाराज प्रेक्षकांनी केलेली आहे.