​झी मराठीवर दाखल होतीये नवी मालिका.. माझी तुझी रेशीमगाठ मालिका घेणार प्रेक्षकांचा निरोप

झी मराठी वाहिनीवरील माझी तुझी रेशीमगाठ मालिका आता लवकरच प्रेक्षकांचा निरोप घेणार आहे. मालिकेत नेहाची स्मरणशक्ती पुन्हा परतली नसली तरी, तिच्या लग्नासाठी यशचे स्थळ सुचवण्यात आले आहे. अनुष्का यशसोबत लग्नाला होकार देते, मात्र तिला आपल्या पूर्वायुष्याबद्दल देखील लवकरच कळणार आहे. पुढच्या आठवड्यात मालिकेच्या शेवटच्या एपिसोडचे शूटिंग पूर्ण केले जाणार आहे. येत्या २१ जानेवारी २०२३ रोजी मालिकेचा शेवटचा भाग प्रसारित होईल. त्यामुळे मालिकेचे कलाकार खूपच भावुक झालेले पाहायला मिळणार आहेत.

यश आणि नेहाच्या जुळून आलेल्या केमिस्ट्रीसोबतच परीचा निरागसपणा, समीर आणि यशची निस्सीम मैत्री आणि शेफालीचा खट्याळपणा प्रेक्षकांना विशेष भावला होता. खूप अगोदर मालिका प्रेक्षकांचा निरोप घेणार असल्याचे कळल्यावर प्रेक्षकांनी ही मालिका चालू ठेवावी असा आग्रह धरला होता. मात्र त्यानंतर मालिकेचे कथानक वाढवत राहण्यापेक्षा मालिकाच संपवण्यावर अधिक भर देण्यात आला. येत्या २३ जानेवारी पासून झी मराठी वाहिनीवर या मालिकेच्या वेळेत आता नवीन मालिका दाखल केली जाणार आहे. सोमवार ते शनिवार संध्याकाळी ६.३० वाजता ३६ गुणी जोडी ही नवीन मालिका प्रसारित होत आहे. असं म्हणतात की छत्तीस गुण जुळले की जोडप्याचा संसार सुखाचा होतो.

इथे नायक नायिकेचे विरोधात असलेले छत्तीस गुण पाहून त्यांचं कसं पटणार याची ही कहाणी आहे. अभिनेत्री अनुष्का सरकटे पुन्हा एकदा मालिकेत नायिकेची भूमिका साकारत आहे. तर आयुष संजीव परत एकदा मुख्य भूमिकेत दिसणार आहे. अनुष्काने झी मराठीवरील कारभारी लयभरी या मालिकेतून प्रमुख भूमिका साकारली होती. याअगोदर अनुष्का श्री लक्ष्मी नारायण मालिकेत लक्ष्मीमातेची भूमिका साकारताना दिसली. तर आयुष संजीव या अभिनेत्याने बॉस माझी लाडाची मालिकेतून काम केले होते. स्वाभिमान हा त्याने अभिनित केलेला पहिला मराठी चित्रपट आहे. आयुष प्रथमच या मालिकेतून झी मराठी वाहिनीवर झळकणार आहे, त्यामुळे त्याच्यासाठी ही मालिका तेवढीच खास ठरली आहे.

कारभारी लय भारी मालिकेनंतर अनुष्का कुठल्या प्रोजेक्टमध्ये दिसली नाही, मात्र झी मराठीने तिला पुन्हा एकदा अभिनयाची संधी मिळवून दिली आहे. मालिकेत आणखी कोणकोणते कलाकार झळकणार आहेत हे लवकरच समोर येईल. देवमाणूस फेम अभिनेता किरण गायकवाड याने मालिकेचा प्रोमो आपल्या स्टोरीवर शेअर केला आहे. त्यामुळे तोही मालिकेचा भाग असणार का असा प्रश्न त्याला विचारण्यात येत आहे. मालिकेत किरण असल्यास नक्कीच विरोधी भूमिकेत दिसणार याची प्रेक्षकांना खात्री आहे. त्यामुळे किरण पुन्हा एकदा खलनायकाच्या भूमिकेत प्रेक्षकांना पाहायला मिळू शकतो. नवीन मालिकेसाठी अनुष्का सरकटे आणि आयुष संजीव यांना खूप खूप शुभेच्छा.