साडी नेसलेल्या पुष्पाला पाहून प्रेक्षकांची उत्सुकता शिगेला

पुष्पा द राईज चित्रपटाच्या अभूतपूर्व यशानंतर चित्रपटाचा सिक्वल येणार असे चित्रपट पाहिल्यावरच समजले होते. चित्रपटाचा शेवट देखील त्याप्रमाणे अर्धवट दाखवण्यात आला होता. पुष्पा २ मध्ये प्रेक्षकांना आणखी कोणती थरारदृश्य पाहायला मिळणार याची उत्सुकता शिगेला पोहोचली. पुष्पा द राइज या ब्लॉकबस्टर चित्रपटाच्या निर्मात्यांनी आज शुक्रवारी त्याचा सिक्वेल पुष्पा द रूल ची झलक प्रदर्शित केली. यानंतर काही मिनिटातच, चित्रपटाचे पोस्टर लॉन्च करण्यात आले. सोशल मीडिया प्लॅटफॉर्मवर पुष्पाचा लूक सर्वत्र चर्चेचा विषय ठरला आहे.
उद्या अल्लू अर्जुनचा वाढदिवस असून निर्मात्यांनी हंट फॉर पुष्पा नावाच्या खास क्रिएटिव्ह व्हिडिओवर चाहत्यांना ट्रीट केले.

पुष्पा राजच्या भूमिकेत अल्लू अर्जुनचा लूक व्हायरल करण्यात आला. यात त्याच्या उग्र रूपाची झलक प्रेक्षकांना पाहायला मिळत आहे. पोस्टरमध्ये अल्लू अर्जुन साडी नेसलेला दिसत आहे. पारंपारिक सोन्याचे आणि फुलांच्या दागिन्यांसह मेकअप केला आहे. शिवाय झुमके आणि बांगड्यांसह नाकाची रिंग देखील दाखवली आहे. त्याच्या उजव्या हातात बंदूक आहे. अल्लू अर्जुनच्या या लुकवर चाहत्यांनी भरघोस प्रतिक्रिया देत चित्रपट पाहण्याची उत्सुकता दाखवली आहे. एकीकडे, पोस्टरने पुष्पाच्या चाहत्यांना चित्रपटाबद्दल उत्सुकता दाखवली आहे. तर दुसरीकडे, अल्लू अर्जुनचा पुष्पा ऋषभ शेट्टीच्या कांताराच्या मार्गाने जात आहे का असा प्रश्न उपस्थित केला जात आहे. काहीजण असा युक्तिवाद करतात की अल्लू अर्जुन पुष्पा २ मध्ये ट्रान्सजेंडरची भूमिका करू शकतो.

तर काहीजण असा दावा करतात की तो कदाचित देवी असण्याची शक्यता आहे. तथापि, पुष्पा २ च्या पोस्टरमधील अल्लू अर्जुनच्या लूकमागील सस्पेंस येणारा काळच सांगेल. तूर्तास पुष्पा २ चित्रपटाचा छोटासा टिझर प्रेक्षकांच्या भेटीला आला आहे. टिझरमधून चित्रपटाच्या कथानकाबाबत काहीसा उलगडा होतो. या छोट्या टीझरमध्ये पुष्पा तिरुपती तुरुंगातून पळून जातो, सगळीकडे हाहाकार माजतो. पुष्पा कुठे आहे याचा पोलीस शोध घेतात मात्र त्याच्या बाजूने  सामान्य जनता बोलायला सुरुवात करते. अखेर पुष्पा जिवंत असल्याची एक्सकलुसिव्ह बातमी टीव्ही माध्यमातून व्हायरल होते. तेव्हा हे लोक आनंद व्यक्त करताना दिसतात. पुष्पा चित्रपटाचा हा टिझर प्रेक्षकांच्या पसंतीस उतरला असून लवकरच चित्रपटाच्या प्रदर्शनाची तारीख जाहीर करण्यात येणार आहे.