ठिपक्यांची रांगोळी मालिकेवर प्रेक्षकांची नाराजी.. या अभिनेत्रीने मालिका सोडण्याचा घेतला निर्णय

स्टार प्रवाहवरील ठिपक्यांची रांगोळी या मालिकेने काही दिवसातच प्रेक्षकांची पसंती मिळवली. विशेष म्हणजे अप्पू आणि शशांकची जुळून आलेली केमिस्ट्री प्रेक्षकांना खूपच भावली. अप्पूचा अल्लडपणा तर शशांकचा समजूतदारपणा या मालिकेतून दाखवण्यात आला आहे. त्यातून घडणाऱ्या गमती जमती मनोरंजन करत आहेत. या मालिकेला भली मोठी स्टार कास्ट लाभली असून ही जाणकार कलाकार मंडळी आपापल्या भूमिका अगदी चोख बजावताना पाहायला मिळतात. मालिका सुरळीत चालू असतानाच अचानक एखाद्या कलाकाराने मालिका सोडणे हे प्रेक्षकांना रुचणे कठीण ठरते.

असाच काहीसा प्रसंग या मालिकेच्या बाबत घडलेला आहे. मालिकेतील नेत्राची भूमिका साकारणाऱ्या स्नेहलता माघाडे हिने ही मालिका सोडली असल्याचे जाहीर केले आहे. या मालिकेत इथून पुढे नेत्राच्या भूमिकेत तुम्हाला दुसऱ्याच अभिनेत्रीला पाहावे लागणार आहे. स्नेहलताने तिच्या अभिनयाने रंगवलेले नेत्राचे पात्र अर्ध्यावर सोडणे हे खरं तर तिच्यासाठी देखील खूप कठीण होते. तिने साकारलेल्या नेत्राला सोशल मीडियावरून एक खास मेसेज दिला आहे की, हे तुझ्यासाठी आहे नेत्रा, मला माहित आहे की तू एक खंबीर आणि स्वतंत्र स्त्री आहेस. तुझ्यासाठी काय योग्य आणि अयोग्य आहे हे तुला माहीत आहे आणि त्यासाठी लढण्याची तुझ्यात हिम्मत आहे.

तुझ्यात खूप ताकद आहे आणि तुझ्या प्रेमाची खोली पाहून मी नेहमीच मंत्रमुग्ध झाले आहे. तुझे मन वाचणे खरोखर कठीण आहे. दुःखाची गोष्ट म्हणजे तुझं नशीब सर्वात कुटिल आहे. तू नेहमीच खूप काही सहन करतेस आणि एखादा टक्का आनंद मिळवतेस. पण आनंदाचा तो एक थेंब तुझ्यासाठी नेहमीच पुरेसा असतो. मला माहित आहे की तू माझ्यावर रागावली आहेस की मी तुला एकटे सोडून गेले. पण मला आशा आहे की तू मला समजून घेशील. आणि तुला आनंद होईल की ही माझी नवीन सुरुवात आहे. नेत्रुदी मला नेहमीच तुझी आठवण येईल आणि या संपूर्ण जगात तुझ्या वेदना माझ्यापेक्षा कोणीही समजणार नाही. अशा प्रकारे नेत्राबद्दल तिने आपल्या भावना व्यक्त करत मालिका सोडले असल्याचे जाहीर केले आहे.

स्नेहलताने साकारलेली नेत्रा प्रेक्षकांच्या मनात घर करून होती. त्यामुळे स्नेहलता आता इथून पुढे मालिकेत नसणार हे प्रेक्षकांच्या नाराजीचे कारण आहे. स्नेहलताने मालिका सोडू नये अशीच प्रेक्षकांची इच्छा आहे. परंतु मी जरी या मालिकेत नसले तरी अप्पू, शशांक, कुक्की, मानसी, अमेय, निखिल, बाबी आत्या आणि सारिका आत्या या सर्वांवर तुम्ही खूप प्रेम करा. आणि ही मालिका तुम्ही जरूर पहा असे तिने आवाहन केले आहे. स्नेहलताने मालिका सोडली खरी परंतु त्यामागचे कारण अद्याप स्पष्ट केलेले नाही. लवकरच मी नवीन काहीतरी घेऊन नक्की तुमच्यासमोर येईल असा विश्वास तिने तिच्या चाहत्यांना दिला आहे.