९ वर्षांपूर्वी आजच्या दिवशी मी प्रवासाची सुरुवात केली.. हृताने सांगितला अभिनय क्षेत्रातला अनुभव

अभिनेत्री हृता दुर्गुळे हिने स्टार प्रवाह वाहिनीवरील दुर्वा या मालिकेतून अभिनय क्षेत्रात पदार्पण केले होते. याअगोदर तिने पुढचं पाऊल या लोकप्रिय मालिकेसाठी सहाय्यक दिग्दर्शिका म्हणून काम सांभाळले होते. हृता ही मूळची कोकणातली मात्र ती लहानाची मोठी झाली ती मुंबईतच. रामणारायन रुईया कॉलेजमधून शिक्षण घेत असताना हृताला चंदेरी दुनियेची ओढ लागली. कला क्षेत्रातील आपल्या या सुंदर प्रवासाबद्दल बोलताना हृता खूपच भारावून गेलेली पाहायला मिळत आहे. काल १३ मार्च रोजी तिने एक व्हिडिओ सोशल मीडियावर शेअर केला. या व्हिडिओत ती म्हणते की, आजच्या दिवशी मार्च २०१३ साली ९ वर्षांपूर्वी माझा मालिकेचा पहिला एपिसोड प्रदर्शित झाला तो क्षण माझ्यासाठी शाइनिंग मोमेन्ट ठरला.

या प्रवासात अनेक विविधांगी भूमिका साकारत असताना माझा पहिला चित्रपट प्रदर्शित होत आहे, हे सर्व माझ्यासाठी अविश्वसनीय आहे. हृताने दुर्वा मालिकेतून पदार्पण केले असले तरी फुलपाखरू या मालिकेमुळे तिला लोकप्रियता मिळाली होती. पुढे सिंगिंग स्टार या रिऍलिटी शोमध्ये सूत्रसंचालन करताना ती दिसली. दादा एक गुड न्यूज आहे हे नाटक आणि स्ट्रॉबेरी शेक ही शॉर्टफिल्म तिने अभिनित केली. अनन्या या चित्रपटातून हृता प्रथमच मोठ्या पडद्यावर झळकणार आहे. त्यामुळे हा चित्रपट तिच्या करिअरच्या दृष्टीने खुपच खास ठरणार आहे. एव्हरेस्ट एंटरटेनमेंट व ड्रीमविवर एंटरटेनमेंट आणि रवी जाधव यांच्या अनन्या या आगामी चित्रपटातून हृता एक आव्हानात्मक भूमिकेतून प्रेक्षकांच्या भेटीला येत आहे.

महाराष्ट्रभर १० जून २०२२ रोजी अनन्या चित्रपट प्रदर्शित होत आहे. चित्रपटाचे लेखन आणि दिग्दर्शन प्रताप माधवराव फड यांनी केले आहे. चित्रपटातील हृताचा लूक मोशन पोस्टरमधून पाहायला मिळतो आहे. हृता सोबत या चित्रपटात चेतन चिटणीस, ऋचा आपटे, सुव्रत जोशी, योगेश सोमण, रेणुका दफ्तरदर आणि सुनील अभ्यंकर हे कलाकार महत्वाच्या भूमिकेत झळकणार आहेत. अनन्या ही असाधारण मुलगी असून या भूमिकेसाठी हृताची कसब लागणार आहे. अर्थात एक्सप्रेशन क्वीन म्हणून ओळख असलेल्या हृता ही भूमिका आपल्या अभिनयाने सहजतेने निभावणार याची खात्री आहे. या पहिल्या वहिल्या चित्रपटासाठी हृता दुर्गुळेचे खूप खूप अभिनंदन.