संकर्षण कऱ्हाडेचा भाऊ झळकणार या मालिकेत..

अभिनेता संकर्षण कऱ्हाडेने मराठी मालिका तसेच नाट्यसृष्टीत चांगलाच जम बसवलेला पाहायला मिळतो आहे. झी मराठीवरील माझी तुझी रेशीमगाठ या मालिकेतून त्याने साकारलेली समीरची भूमिका लोकप्रियता मिळवत आहे. किचन कलाकार आणि तू म्हणशील तसं या मालिका आणि नाटकांच्या दौऱ्यामध्ये सध्या तो व्यस्त असलेला पाहायला मिळतो आहे. संकर्षणचा भाऊ अधोक्षज कऱ्हाडे हा देखील अभिनेता आहे. लहानपणापासूनच हे दोघेही नाटकांमधून काम करत असत. अधोक्षजने झी मराठीवरील महाराष्ट्राचा सुपरस्टार या रिऍलिटी शोमध्ये पार्टिसिपेट केले होते. त्यानंतर तो झीवरील घेतला वसा टाकू नको या मालिकेत महत्वाच्या भूमिकेत दिसला होता. शांतता! मराठीचं कोर्ट चालू आहे या लघुपटात देखील तो झळकला आहे.

स्टार प्रवाहवरील पिंकीचा विजय असो या मालिकेत अधोक्षज बंटीची हटके भूमिका निभावताना दिसणार आहे. येत्या ३१ जानेवारी २०२२ पासून रात्री ११.०० वाजता ही मालिका प्रसारित केली जात आहे. तरविजय आंदळकर आणि शरयू सोनवणे मालिकेत मुख्य भूमिकेत दिसणार आहेत. युवराज धोंडेपटील आणि पिंकीची हटके प्रेमकहाणी या मालिकेतून पाहायला मिळणार आहे. युवराज आणि पिंकीच्या या कथेत बंटीची भूमिका नेमकी काय असणार याची उत्सुकता आहे. कारण माझी तुझी रेशीमगाठ या मालिकेत संकर्षण कऱ्हाडेने नायकाच्या मित्राची भूमिका बजावली आहे. त्याने साकारलेली ही भूमिका प्रेक्षकांना विशेष भावली आहे. त्यामुळे अधोक्षज देखील नायकाच्या मित्राच्याच भुमिकेत दिसणार की विरोधी भूमिकेत यावर प्रश्नचिन्ह प्रेक्षकांमध्ये उपस्थित झाले आहे.

लवकरच मालिकेतून या भूमिकेबाबत उलगडा होईल. पिंकीचा विजय असो या मालिकेत अमिता खोपकर, पियुष रानडे, हर्षद नायबळ (बालकलाकार), अंकिता जोशी, कल्याणी जाधव, मुकेश जाधव, सुनील तावडे असे बरेचसे कलाकार झळकणार आहेत. हर्षद नायबळ प्रथमच या मालिकेतून छोट्या पडद्यावर झळकणार आहे. त्याच्यासाठी ही मालिका खूप खास ठरली आहे. याअगोदर सूर नवा ध्यास नवा या रिऍलिटी शोमध्ये कंटेस्टंट बनून आला होता. त्यामुळे या मालिकेची उत्सुकता प्रेक्षकांमध्ये निर्माण झाली आहे. आपल्या गाण्याने त्याने प्रेक्षकांना भुरळ घातली होती, तसेच शोचे सूत्रसंचालन देखील केलेले पाहायला मिळाले होते. तूर्तास या नव्या मालिकेतील बंटीच्या भूमिकेसाठी अधोक्षज कऱ्हाडेचे अभिनंदन आणि पुढील प्रवासासाठी शुभेच्छा.