मराठी सृष्टीतील आणखी एक अभिनेता नुकताच झाला विवाहबद्ध.. सुव्रत जोशीच्या बहिणीसोबत थाटला संसार

आज सगळीकडे अक्षया देवधर आणि हार्दिक जोशीच्या लग्न सोहळ्याची बातमी पाहायला मिळत आहे. गेल्या अनेक दिवसांपासून या दोघांच्या लग्नाची प्रतीक्षा त्यांच्या चाहत्यांना होती. त्यामुळे त्यांच्या लग्नाचे एक्सक्लुजिव्ह फोटो व्हायरल झालेले पाहायला मिळाले. मात्र या धामधुमीत आणखी एक प्रसिद्ध अभिनेता विवाहबंधनात अडकल्याचे समोर येत आहे. हा अभिनेता आहे माझा होशील ना मालिकेतील डॉक्टरची भूमिका साकारणारा आशय कुलकर्णी. आज २ डिसेंबर २०२२ रोजी आशय कुलकर्णी आणि सानिया गोडबोले यांचा विवाह संपन्न झाला. त्यांच्या लग्नाला मराठी सृष्टीतील कलाकारांनी उपस्थिती लावली होती.

दापोली येथील लाडघर बिच जवळ असलेल्या एका फार्म हाऊसमध्ये या दोघांच्या लग्नाचा सोहळा थाटात पार पडला. यावेळी माझा होशील ना मालिकेतील अभिनेता विराजस कुलकर्णी, शिवानी रांगोळे, सखी गोखले, सुव्रत जोशी यांनी हजेरी लावलेली पाहायला मिळाली. आशय कुलकर्णी आणि सानिया गोडबोले यांची कॉलेजपासूनची मैत्री आता नात्याच्या बंधनात अडकली आहे. सानिया गोडबोले ही अभिनेता सुव्रत जोशीची मावस बहीण आहे. या भावा बहिणीचे खूप छान बॉंडिंग असलेले पाहायला मिळते. काल आशय आणि सानियाच्या संगीत सोहळ्याची धामधूम रंगली होती, त्यावेळी या दोघांनी गाण्यावर ठेका धरला होता. ऋषीकेश रानडे आणि प्राजक्ता जोशी रानडे या गायक दाम्पत्यांनी संगीत मैफिलीची रंगत अधीकच वाढवली.

आशय कुलकर्णी हा गेल्या अनेक वर्षांपासून अभिनय क्षेत्रात कार्यरत आहे. तर त्याची पत्नी सानिया गोडबोले ही उत्कृष्ट नृत्यांगना आहे. सानियाने अनेक मंचावरून आपल्या नृत्याची कला सादर केली आहे तर ती स्वतःचे नृत्याचे क्लासेस देखील चालवते. आशय कुलकर्णी आणि सोनाली कुलकर्णी यांची प्रमुख भूमिका असलेला व्हिक्टोरिया हा मराठी चित्रपट १६ डिसेंबर रोजी प्रदर्शित होणार आहे. माझा होशील ना, पाहिले न मी तुला, फोटो कॉपी, अधांतरी, सुंदरी, डबल सिट किती सांगायचंय मला अशा चित्रपट मालिकेतून तो प्रेक्षकांच्या भेटीला आला आहे. आज अक्षया देवधर आणि हार्दिक जोशी यांच्यासोबत आशय कुलकर्णी आणि सानिया गोडबोले यांनी देखील लग्नाची गाठ बांधली असल्याने सेलिब्रिटींनी अभिनंदनाचा वर्षाव केला आहे.