कावेरीच्या वडिलांची अट राज करणार का पूर्ण.. मालिकेतला ट्रॅक पाहून चित्रपटाची झाली आठवण

मालिका आणि चित्रपटाचे कथानक हे बहुतेकदा जवळजवळ असणारे वाटते. मालिकेवरून चित्रपट बनवणे आणि चित्रपटावरून मालिका तयार करणे या गोष्टी हिंदी सृष्टीला तरी काही नवीन नाहीत. असाच काहीसा ट्रॅक भाग्य दिले तू मला या मालिकेत प्रेक्षकांना पाहायला मिळत आहे. राजवर्धन आणि कावेरीचे लग्न व्हावे अशी प्रेक्षकांची ईच्छा होती. भर मांडवात वैदेहीचा डाव उधळून लावत कावेरी राजवर असलेल्या प्रेमाची कबुली देते. मात्र आता मालिकेत सगळ्या सकारात्मक गोष्टी घडत असतानाच कावेरीच्या वडिलांनी त्यांच्या लग्नात आडकाठी आणलेली दिसत आहे.

वैदेही आणि राजवर्धन यांच्या लग्नाची लगबग गेल्या काही दिवसांपासून मालिकेत सुरू होती. मात्र वैदेही कावेरीला फसवून राज सोबत लग्नाला तयार झाली हे तिला समजते. आपलं राजवर प्रेम असूनही वैदेही अशी का वेगळी याचा जाब विचारते. झालेल्या चुकीबद्दल वैदेही कावेरीची माफी सुद्धा मागते. आता मालिकेत राज आणि कावेरी एकत्र आलेले दिसणार, तेवढ्यात कावेरीच्या वडिलांना जावई म्हणून राज मान्य नसतो. आपल्या मुलीने आपण निवडलेल्या मुलाशीच लग्न करावं असं वचन कावेरीकडून घेतलेलं असतं. म्हणून भर मांडवातून घेऊन कावेरीला आपल्या गावी घेऊन जातात. इथे मालिकेला रंजक वळण मिळणार आहे, कारण राज कावेरीला मिळवण्यासाठी तिच्या वडिलांची अट पूर्ण करताना दिसणार आहे.

राजने एकही पैसा घेऊन न येता गावात राहून दाखवायचं आहे. तेव्हाच ते आपल्या लेकीचे लग्न त्याच्यासोबत लावून देणार आहेत. ही अट पूर्ण करण्यासाठी राज देखील तयार झाला असून तो कावेरीच्या गावी मेहनत करून पैसे कमवून दाखवणार आहे. मालिकेच्या या ट्रॅकवरून मैने प्यार किया या चित्रपटाची आठवण प्रेक्षकांना झाली आहे. सुमन सोबत लग्न करण्यासाठी प्रेमला तिच्या वडिलांची अट पूर्ण करायची असते. तो देखील खाणीत काम करून पैसे कमवून दाखवतो, त्यावेळी सुमन त्याची साथ देताना दिसते. असाच काहीसा ट्विस्ट याही मालिकेत तुम्हाला पाहायला मिळणार आहे. राजवर्धन मोहिते आता सगळी संपत्ती सोडुन कावेरीच्या गावी राहून दाखवणार आहे. इथे येऊन राज मिळेल ती कामं करताना दिसणार आहे.

कावेरीचे वडील तेव्हाच राजसोबत लग्न करण्यास परवानगी देणार आहेत. खरं तर मालिकेतील ही रील लाईफ जोडी प्रेक्षकांना विशेष भावली आहे. विवेक सांगळे आणि तन्वी मुंडले यांनी ही भूमिका चोख बजावली आहे. बऱ्याचदा हे दोघेही मजेशीर रिल्स बनवताना दिसली आहेत, त्यावरून या दोघांनी रिअल लाईफमध्येही लग्न करावं असा सल्ला चाहत्यांनी दिला आहे. मालिकेचा हा रंजक ट्रॅक प्रेक्षकांनाही आवडला असून राज समोर आता कोणकोणती आव्हानं असणार याची उत्सुकता प्रेक्षकांमध्ये निर्माण झाली आहे.