​बाळाच्या जन्मानंतर काही महिन्यातच अभिनेत्री मालिकेत झाली सक्रिय..

आई कुठे काय करते या मालिकेत बऱ्याच दिवसांच्या प्रतीक्षेनंतर पुन्हा एकदा अरुंधतीची एन्ट्री झालेली आहे. अरुंधतीची भूमिका साकारणारी मधुराणी प्रभुलकर हिची एक छोटीशी सर्जरी करण्यात आली. त्यामुळे विश्रांतीसाठी तिने या मालिकेतून काही काळासाठी ब्रेक घेतला होता. या दरम्यान मालिकेत बऱ्याचशा घडामोडी घडल्या. आप्पा घर सोडून निघून गेल्यानंतर त्यांचा अपघात होतो या अपघातामुळे त्यांची स्मृती काही प्रमाणात गेलेली दिसते. अरुंधतीच्या येण्याने मालिकेला पुन्हा एक नवे वळण मिळाले. अविनाशच्या कामगिरीमुळे एका नवीन प्रोजेक्टसाठी त्याला आता लंडनला जाण्याची संधी मिळाली आहे.

अशुतोषचा वाढदिवस असल्याने त्याला काय गिफ्ट द्यावे म्हणून अरुंधती विचार करत असते. या सर्व गोंधळात ती एका कपड्याच्या दुकानात जाते. तिथे नेमकं काय घ्यावं हे तिला सुचत नसतं. त्याच वेळी तिथे एक मुलगी येते, ती अरुंधतीला काय घ्यायचं याचा सल्ला देते आणि चांगल्या शर्टची निवड करून देते. मालिकेत ही मुलगी एक महत्वाची भूमिका साकारताना दिसणार आहे. म्हणजेच ती आशुतोषच्या बहिणीची विणाची भूमिका निभावणार आहे. ही भूमिका अभिनेत्री स्वरांगी मराठे साकारणार असल्याचे स्पष्ट झाले आहे. काही महिन्यांपूर्वीच स्वरांगीने दुसऱ्या बाळाला जन्म दिला होता. बाळाच्या जन्मानंतर अवघ्या सात ते आठ महिन्यातच तिने मालिकेतून काम करण्यास सुरुवात केली आहे. स्वरांगी मराठे निखिल काळे सोबत २०१६ साली विवाहबद्ध झाली होती.

जुलै महिन्यात दुसऱ्यांदा आई झाल्याची बातमी तिने सोशल मीडियावर जाहीर केली होती. ‘सोयरा’ हे तिच्या थोरल्या लेकीचं नाव आहे. ती साधारण तीन वर्षांची आहे तर काही महिन्यांपूर्वी जन्मलेल्या तिच्या लेकाचं नाव तिने ‘सुहित’ ठेवलं आहे. पोर बाजार, गोंदण, बॉलिवूड चित्रपट बाजीराव मस्तानी, स्वराज्यरक्षक संभाजी अशा चित्रपट आणि मालिकेतून स्वरांगीला अभिनयाची संधी मिळाली होती. आभाळमाया या मालिकेतून बालकलाकार म्हणून स्वरांगी नावारूपाला आली. स्वरांगीने गायनाचे देखील धडे गिरवले आहेत; त्यामुळे ती एक उत्कृष्ट गायिका देखील आहे. अनेक मोठमोठ्या कार्यक्रमात ती गाणी सादर करताना दिसते. आपल्या दोन्ही मुलांची जबाबदारी सांभाळत तिने पुन्हा अभिनय क्षेत्रात पदार्पण केले आहे.

आई कुठे काय करते या मालिकेत स्वरांगी अशुतोषच्या बहिणीची भूमिका साकारणार असे बोलले जात आहे. तूर्तास अरुंधती अशुतोष सोबत लवकरच लग्न करणार आहे. तसे ति आता सगळ्यांसमोर बोलून दाखवणार आहे, त्यामुळे अनिरुद्धलाच नव्हे तर घरातील सगळ्यांनाच धक्का बसणार आहे. मात्र अरुंधतीच्या या निर्णयामुळे आप्पा मात्र भलतेच खुश झालेले आहेत. मालिकेत स्वरांगीची भूमिका काय असेल याबाबत लवकरच उलगडा होईल या भूमिकेसाठी स्वरांगीचे खूप खूप अभिनंदन.