आज बोललीस, परत बोललीस तर खूप महागात पडेल.. अपूर्वाने दिली तंबी, काय घडलं नेमकं?

बिग बॉस मराठीच्या चौथ्या सीझनचा असा एकही एपिसोड संपला नाही की ज्यात भांडण होत नाही. पहिल्या दिवसापासून बिग बॉसच्या घरातील अपूर्वा नेमळेकरने भांडणाचा श्रीगणेशा केला. प्रसाद जवादे आणि अपूर्वाची चांगलीच जुंपली होती. अर्थात घरात होणाऱ्या भांडणांचा हिशोब चावडीवर महेश मांजरेकर करतातच, पण चर्चा होते ती कोण कोणाशी भांडलं. आता आजच्या नव्या एपिसोड मध्ये अपूर्वा आणि अमृता एकमेकींना भिडल्याचं दिसतंय. बॉडी शेमिंग हा या भांडणाचा मुद्दा असल्याने नेमकं काय कारण घडलं असेल. बिग बॉस मराठी या शोचा चौथा सीझन आता चांगलाच रंगत चालला आहे.

अपूर्वी गेल्या आठवड्यातील कॅप्टन झाल्याने तिच्यावर चाहते अभिनंदनाचा वर्षाव करत आहेत. गेल्या आठवड्यात बिग बॉसच्या घरात खूप घडामोडी घडल्या. जसं या घरात काही लोकांची जवळीक वाढताना प्रेक्षकांच्या नजरेतून सुटत नाही. तसं ज्यांच्यामधून विस्तव जात नाही अशाही काही जोड्या घरात रोज भांडताना दिसत आहेत. कुणी कुणाला थेट बोलत आहे तर कुणी टोमणे मारत आहेत. असाच प्रकार अमृता धोंगडे आणि अपूर्वा नेमळेकर यांच्यामध्ये घडल्याचं अपूर्वाच्या बोलण्यातून समोर आलं आहे. बिग बॉसच्या घरात चुगलीवरून विषय निघताच अपूर्वाचा पारा चढल्याचं दिसत आहे. अपूर्वाला एक चुगली आली आहे जी अमृताने केली आहे.

तीची चुगली अपूर्वाने अमान्य केली आहे. अपूर्वा अमृताला असं म्हणत आहे की, माझ्या जाडीवरून बोललेलं मी अजिबात खपवून घेणार नाही. आता बोललीस, परत आयुष्यात असं बोललीस तर तुला खूप महागात पडेल. यावर अमृतानेही अपूर्वाला रोखठोक प्रत्युत्तर दिलं आहे. अमृता अपूर्वाला म्हणाली की म्हटलं तर काय करशील. तुझा प्रॉब्लेम काय आहे? पण अपूर्वाचा सूर यावर कायम आहे. तुझा प्रॉब्लेम मी आहे; मला अजिबात आवडत नाही शारीरीक कमेंट केलेल्या. बॉडी शेमिंगवरून बोलायचं नाही. अमृताने जर बॉडी शेमिंगवरून अपूर्वाला टोमणा मारला असेल तर अमृताची ती चूकच आहे अशा कमेंट येत आहेत.

पण इथे अजून एक मेख आहे. चावडीवर हा सगळा प्रकार सुरू असल्याने बिग बॉस होस्ट महेश मांजरेकर यांनीही अमृताला चुकीची जाणीव करून दिली आहे. प्रचंड रागवलेली अपूर्वा बॉडी शेमिंगवर बोलणाऱ्या अमृताला धारेवर धरून महेश मांजरेकर यांनीही सुनावलं आहे. अमृताने अपूर्वाविषयी केलेली ही चुगली कुणाकडे केली? खरंतर हे भांडण आणि त्याचा विषय गंभीर आहे. घरातील इतर सदस्य अमृताची बाजू घेणार की अपूर्वाला साथ देणार हे पाहण्याची उत्सुकता लवकरच संपेल. अमृताने अपूर्वावर मारलेल्या टोमण्यामागचं खरं कारणही प्रेक्षकांना कळेल.