श्रेयस तळपदे आणि मुक्ता बर्वे यांचा आगामी चित्रपट.. बॉलिवूडची ही मराठमोळी बालकलाकार दिसणार मुलीच्या भूमिकेत

अभिनेता श्रेयस तळपदे आणि मुक्ता बर्वे बऱ्याच कालावधीनंतर मराठी मालिकेकडे वळले आहेत. श्रेयस तळपदे साकारत असलेली माझी तुझी रेशीमगाठ ही मालिका प्रेक्षकांच्या विशेष पसंतीस उतरली आहे. त्यात श्रेयसने साकारलेली यशची भूमिका लक्षवेधी ठरली आहे. तर मुक्ता बर्वे सोनी मराठीवरील अजूनही बरसात आहे या मालिकेतून प्रेक्षकांसमोर आली आहे. मालिकेत तिने साकारलेली मीरा प्रेक्षकांना भावली आहे. मुक्ता आणि श्रेयस हे दोघे लवकरच मराठी चित्रपटातून प्रेक्षकांच्या भेटीला येत आहेत. ‘आपडी थापडी’ या चित्रपटाचा पहिला प्रोमो प्रेक्षकांच्या भेटीला आला आहे. या प्रोमोमध्ये चित्रपटाचा नायक आपल्या लेकीसोबत मजामस्ती करताना दिसणार आहे. आपडी थापडी हा एक कौटुंबिक चित्रपट असून गावरान ​​भाषेचा बाज मिळाला आहे.

चित्रपटात श्रेयस तळपदे आणि मुक्ता बर्वे मुख्य भूमिकेत दिसणार आहेत. नंदू माधव, संदीप पाठक, खुशी हजारे, नवीन प्रभाकर या कलाकारांची साथ त्यांना मिळाली आहे. चित्रपटाच्या शूटिंगला सुरुवात झाली असून येत्या काही महिन्यातच हा चित्रपट प्रेक्षकांच्या भेटीला येणार आहे. या चित्रपटात बॉलिवूडची एक बालकलाकार झळकणार आहे. ही बालकलाकार याअगोदर चित्रपटातून आणि जाहिरात क्षेत्रात नाव कमावताना दिसली आहे. या बालकलाकाराचे नाव आहे खुशी हजारे. खुशी हजारे ही आपडी थापडी चित्रपटामध्ये श्रेयस आणि मुक्ताच्या मुलीच्या भूमिकेत दिसणार आहे. खुशी द हाऊस नेक्स्ट डोअर या हिंदी चित्रपटसोबतच विकी कौशलचा आगामी चित्रपट ‘भूत’ मध्ये ती महत्वाच्या भूमिकेत दिसणार आहे. 

ब्रिटानिया गुड डे, लेन्स कार्टच्या टीव्ही जाहिरातीत खुशी हजारे झळकली आहे. आपडी थापडी हा खुशीचा पहिला मराठी चित्रपट असणार आहे. त्यामुळे आपल्या पहिल्या वहिल्या मराठी चित्रपटासाठी खुशी खूप मेहनत घेताना दिसत आहे. माझी तुझी रेशीमगाठ या मालिकेत श्रेयस तळपदे सोबत परी म्हणजेच मायरा वायकुळ ही बालकलाकार झळकली. या दोघांची मालिकेतून खूप चांगली गट्टी जमली आहे. असेच बॉंडिंग आता श्रेयस आणि खुशी यांच्यात झालेले पाहायला मिळत आहे. बाप लेकीचं सुंदर नातं या चित्रपटातून प्रेक्षकाना पाहायला मिळणार असल्याने या चित्रपटाची उत्सुकता निर्माण झाली आहे. या आगामी चित्रपटासाठी मुक्ता श्रेयस सोबत सहभागी सर्वच कलाकारांना शुभेच्छा.