ठिपक्यांची रांगोळी मालिकेत अपूर्वा शशांकच्या केळवणात दिपाची एन्ट्री

स्टार प्रवाहवरील ठिपक्यांची रांगोळी या मालिकेत लवकरच शशांक आणि अपूर्वा लग्नबांधनात अडकताना पाहायला मिळणार आहेत. अपूर्वा वर्धनचे शशांक सोबत लग्न जुळावे म्हणून कानिटकर कुटुंबांनी पुरेपूर प्रयत्न केले होते. मात्र अखेर शिष्ट आणि खडूस स्वभावाची असलेली ही दोन टोकं आता एक होताना दिसणार आहेत. इतके दिवस मालिकेमधून शशांक आणि अपूर्वा या दोघांमधली नोकझोक प्रेक्षकांना आवडू लागली होती. त्यामुळे हे दोघे कधी लग्न करणार याची उत्सुकता निर्माण झाली होती. चेतन वडनेरे आणि ज्ञानदा रामतीर्थकर यांनी शशांक आणि अपूर्वाची भूमिका आपल्या सहजसुंदर अभिनयातून सुरेख रंगवली आहे.

या मालिकेत बरचसे जाणते कलाकार झळकताना दिसतात, त्यामुळे अल्पावधीतच मोठा प्रेक्षकवर्ग या मालिकेने जमवला आहे. मालिकेत शरद पोंक्षे, उज्वला जोग, लीना भागवत, सुप्रिया पाठारे, सारिका नवाथे, अतुल तोडणकर, नम्रता प्रधान, शीतल कुलकर्णी, मुग्धा गोडबोले, राजन ताम्हाणे यांनी महत्वाच्या भूमिका बजावल्या आहेत. अतुल तोडणकरने साकारलेला कुकी मालिकेत नेहमीच धमाल उडवून देताना दिसतो. अपूर्वा आणि शशांक एकत्र यावेत म्हणून या कुकीने अनेक प्रयत्न केले आहेत. लवकरच मालिकेत शशांक आणि अपूर्वाच्या लग्नसोहळ्याची लगबग पाहायला मिळणार आहे. त्यानुसार त्यांच्या केळवणाची देखील जय्यद तयारी सुरू झाली आहे. यात आणखी रंग भरण्यासाठी मालिकेत नव्या सदस्याची एन्ट्री होत आहे.

रंग माझा वेगळा या मालिकेतील दीपा शशांक आणि अपूर्वाला शुभेच्छा देण्यासाठी कानिटकर कुटुंबात दाखल झालेली पाहायला मिळत आहे. शशांक आणि अपूर्वाच्या केळवणाची तयारी जोरदार सुरू असून दिपाच्या एंट्रीने ही मालिका अधिकच खुलून येणार आहे. अर्थात मालिकेचा टीआरपी वाढवण्यासाठी वेगवेगळ्या युक्त्या योजल्या जातात, याचाच एक भाग म्हणून मालिकेत दिपाची एन्ट्री करण्यात आली आहे. याअगोदरही अशा युक्त्या मालिकांमधून केलेल्या पाहायला मिळाल्या होत्या. याच मालिकेत काही दिवसांपूर्वीच फुलला सुगंध मातीचा या मालिकेतील जिजाअक्काची एन्ट्री करण्यात आली होती. त्यामुळे मालिकेची रंगत अधिकच वाढली होती. तूर्तास मालिकेत शशांक आणि अपूर्वा यांच्या लग्नसोहळ्याची तयारी सुरू आहे, या विशेष भागाची प्रेक्षकांनाही मोठी उत्सुकता लागून राहिली आहे.