​बाळू मामाच्या नावानं चांगभलं मालिकेतील अभिनेता प्रेमात?.. कोण आहे ही अभिनेत्री

बाळू मामाच्या नावानं चांगभलं या लोकप्रिय मालिकेतील मुख्य पात्र अभिनेता सुमित पूसावळे याने साकारले आहे. या मालिकेमुळे सुमित पूसावळे हे नाव महाराष्ट्राच्या घराघरात पोहोचलं आहे. सुमितचा जन्म दिघंजी गावचा. इथेच त्याचे शालेय शिक्षण पूर्ण झाले. पुढे पुण्यात जाऊन त्याने हॉटेल मॅनेजमेंटचे प्रशिक्षण घेतले. शाळेत आणि कॉलेजमध्ये असताना सुमितने सांस्कृतिक कार्यक्रमातून सहभाग दर्शवला होता. नाटका​​चे वेडही होते. पण हॉटेल मॅनेजमेंट केल्यानंतर त्याने याच क्षेत्रात काही काळ स्थिर राहण्याचे ठरवले. परंतु या क्षेत्रात फारसे मन रमेना मग सरगम चित्रपटातून त्याने मोठ्या पडद्यावरून अभिनय क्षेत्रात पदार्पण केले.

इथे काम करत असताना हिंदी चित्रपटासाठी सहाय्यक दिग्दर्शक म्हणून काम करण्याची नामी संधी मिळाली. हळूहळू कला क्षेत्रात आपला जम बसवत असतानाच झी मराठीवरील ‘लागीरं झालं जी’ या मालिकेत झळकण्याची संधी मिळाली. त्याने साकारलेले सुम्याचे पात्र विरोधी भूमिका दर्शवणारे असले तरी या भूमिकेत सुमित पुसावळे भारदस्त वाटला होता. या मिळालेल्या संधी मुळे सुमितला स्वराज्यरक्षक संभाजी मालिकेत देखील अभिनयाची संधी मिळाली. मालिकेतून छोट्या छोट्या भूमिकेत चमकणारा सुमित पुढे बाळू मामाच्या नावानं चांगभलं या मालिकेत मुख्य भूमिकेत दिसला. आपल्या दमदार अभिनयाने त्याने साकारलेले बाळूमामा प्रत्यक्षात कसे असतील ते प्रेक्षकांना दाखवून दिले. मालिकेतून लोकप्रियता मिळवणारा सुमित सध्या एका पोस्टमुळे चांगलाच चर्चेत आला आहे. नवीन वर्षाच्या शुभेच्छा देत सुमितने एक फोटो शेअर केला आहे. या फोटोत सुमित त्याच्या खास मैत्रिणीसोबत दिसत आहे. सुमितची ही खास मैत्रीण मराठी सृष्टीतील अभिनेत्री आहे.

या अभिनेत्रीचे नाव आहे ‘दिशा परदेशी’. दिशा परदेशी हिने स्टार प्रवाहवरील स्वाभिमान शोध अस्तित्वाचा या मालिकेत निहारिकाची भूमिका साकारली आहे. इंडियन हेअर अँड ब्युटी २०१६ चा पुरस्कार दिशाने पटकावला होता. ज्वेलरी आणि कपड्यांच्या ब्रँडसाठी दिशाने मॉडेलिंग केलं आहे. यासोबतच मॅक डॉनल्ड, टाटा मोटर्स, बिग बझार सारख्या जाहिरातीतून तिला झळकण्याची संधी मिळाली होती. दिशा परदेशी आणि सुमित पुसावळे यांचा एकत्रित असलेला हा फोटो बरेच काही सांगून जाताना दिसत आहे. सुमितसोबत दिशाने देखील तिच्या इन्स्टाग्रामवर हा फोटो शेअर केला आहे. या फोटोवरून हे दोघे एकमेकांच्या प्रेमात आहेत अशी देखील चर्चा रंगली आहे. त्यांच्या चाहत्यांनी देखील तशाच स्वरूपाच्या काही प्रतिक्रिया देखील दिल्या आहेत. यावर सुमित आणि दिशा काय खुलासा करणार याची उत्सुकता आहे. तूर्तास सुमित पुसावळे आणि दिशा परदेशी यांना नवीन वर्षाच्या खूप खूप शुभेच्छा.