महाराणी ताराराणींचा इतिहास छोट्या पडद्यावर… ही प्रसिद्ध अभिनेत्री दिसणार ताराराणींच्या भूमिकेत

स्वराज्यरक्षक संभाजी, स्वराज्य जननी जिजामाता या ऐतिहासिक मालिकेनंतर “स्वराज्य सौदामिनी ताराराणी” ही मालिका लवकरच प्रेक्षकांच्या भेटीला येत आहे. या मालिकांमधून छत्रपती संभाजी महाराजांचा इतिहास तसेच जिजाऊंचा इतिहास प्रेक्षकांना छोट्या पडद्यावर अनुभवायला मिळाला होता. त्यामुळे छत्रपती शिवाजी महाराज, छत्रपती संभाजी महाराज, राजाराम महाराज यांच्या पश्चात स्वराज्याची घडी बसवण्याची मोलाची जबाबदारी सांभाळणाऱ्या महाराणी ताराराणींचा इतिहास प्रेक्षकांना समजावा म्हणून त्यांच्या कार्यावर मालिका काढण्यात आली आहे. लवकरच ही मालिका सोनी मराठी वाहिनीवर प्रेक्षकांना पाहायला मिळणार आहे.

येत्या १५ ऑक्टोबर २०२१ पासून ही मालिका प्रक्षेपित करण्यात येणार आहे, मालिकेत यतीन कार्येकर विरोधी भूमिकेत दिसत आहेत तर मुख्य भूमिका महाराणी ताराराणींची भूमिका कोणती अभिनेत्री निभावणार याचा उलगडा झाला आहे. ‘स्वराज्य सौदामिनी ताराराणी’ या नव्याने येऊ घातलेल्या ऐतीहासिक मालिकेतून महाराणी ताराराणींची भूमिका अभिनेत्री “स्वरदा ठिगळे” निभावणार आहे. स्वरदा ठिगळे ही मराठी तसेच हिंदी मालिका अभिनेत्री आहे. अभिनेत्री स्वरदा ठिगळे ही मुळची पुण्याची असून तिचा जन्म २९ ऑक्टोबर १९९३ साली झाला. स्वरदाने तिच्या करियरची सुरूवात मराठी मालिका सृष्टीतून केली आहे. २०१३ साली तिने ‘माझे मन तुझे झाले’ या मराठी मालिकेतून छोट्या पडद्यावर पदार्पण केले होते. या मालिकेत तिने शुभ्राची भूमिका साकारली होती. तिने साकारलेली ही भूमिका खूपच लोकप्रिय झाली होती. तसेच २०१७ साली तिने हिंदी मालिका सृष्टीत पदार्पण केले.

‘सावित्री देवी कॉलेज अँड हॉस्पिटल’ या हिंदी मालिकेत तिने सांची मिश्राची भूमिका केली होती. या मालिकेनंतर आणखी एका हिंदी मालिकेत तिला अभिनयाची संधी मिळाली. स्टार भारत वाहिनीवरील ‘प्यार के पापड’ मालिकेतही ती झळकली होती. या मालिकेत तिने शिविकाची भूमिका साकारली होती. थोडं तुझं थोडं माझं, नागीण अशा मराठी चित्रपट आणि हिंदी मालिकेतून तिने आपल्या अभिनयाची छाप पाडली. हिंदी मालिका सृष्टीत काम करत असताना तिला आता पुन्हा एकदा मराठी सृष्टीत मुख्य भूमिका साकारण्याची संधी मिळत आहे. स्वराज्य सौदामिनी ताराराणी या मालिकेतून ती प्रथमच ऐतिहासिक भूमिका साकारताना दिसणार आहे. नुकताच या मालिकेचा दुसरा प्रोमो प्रेक्षकांना पाहायला मिळाला असून स्वरदाच्या अभिनयाने महाराणी ताराराणींचा इतिहास अधिकच खुलणार असे म्हटले आहे. सुरुवातीच्या प्रोमोमध्ये महाराणी ताराराणींची थोडीशी झलक पाहायला मिळाली होती.

त्यावरून ही अभिनेत्री प्राजक्ता गायकवाड किंवा अश्विनी महंगडे निभावणार असल्याचे सोशल मीडियावर तर्क लावले जात होते. मात्र मालिकेच्या दुसऱ्या प्रोमोमध्ये आता ही भूमिका अभिनेत्री स्वरदा ठिगळे साकारणार असल्याचे स्पष्ट झाले आहे. अर्थात महाराणी ताराराणींचा इतिहास जाणून घेण्याची ईच्छा तमाम प्रेक्षकांना लागून राहिली आहे, त्यामुळे या मालिकेची उत्कंठा शिगेला पोहोचली आहे. स्वरदा ठिगळेला महाराणी ताराराणींच्या भूमिकेसाठी खूप खूप शुभेच्छा आणि मराठी मालिकेत पुनरागमनसाठी मनःपूर्वक अभिनंदन!