मला कुणी मालिकेतून काढलेलं नाही.. नाराज प्रेक्षकांना अभिनेत्रीने केले आवाहन

एखादी मालिका प्रेक्षकांच्या मनात घर करून असते. त्या मालिकेतील कलाकारांसोबत प्रेक्षकांचे एक छान बॉंडिंग जुळलेले असते. पण अशातच जर त्या मालिकेतील प्रमुख पात्रालाच तडकाफडकी काढून टाकण्यात येते, तेव्हा त्या मालिकेची लिंक कुठेतरी तुटलेली दिसून येते. ज्या कलाकाराने ती भूमिका प्रेक्षकांच्या मनात उतरवलेली असते त्याच्याजागी अचानक कोणी नवखा कलाकार आला तर प्रेक्षक कलाकाराला सहजासहजी स्वीकारत नाहीत. आजवर असे अनेक मालिकांच्या बाबतीत घडलेले आहे. असाच काहीसा अनुभव प्रेमास रंग यावे या मालिकेतून प्रेक्षकांना मिळाला आहे.

प्रेमास रंग यावे ही सन मराठीवरील मालिका आहे. मालिकेत अक्षराची भूमिका साकारणाऱ्या अभिनेत्रीला तडकाफडकी काढून टाकण्यात आल्याने मालिकेच्या प्रेक्षकांनी नाराजी व्यक्त केली आहे. अक्षरा आणि सुंदर हे या मालिकेचे नायक नायिका आहेत. मालिका छान सुरळीत असतानाच अक्षराची भूमिका साकारणारी अभिनेत्री अमिता कुलकर्णी हिने मालिकेतून एक्झिट घेतली आहे. अमिताच्या जागी अमृता फडके ही भूमिका साकारत आहे, पण प्रेक्षकांनी अमिताला मालिकेत परत आणा अशी मागणी केली आहे. प्रेक्षकांच्या या मागणीवर स्वतः अमिताने एक खुलासा केला आहे. एक व्हिडीओ शेअर करत अमिता मालिकेतून का बाहेर पडली याचे कारण तिने सांगितले आहे. अमिता म्हणते की प्रेमास रंग यावे मालिका मी माझ्या वैयक्तिक कारणासाठी सोडली आहे.

मला मालिकेतून काढून टाकले या सगळ्या अफवा आहेत. मला यासंदर्भात अनेकांचे मेसेजेस येत आहेत. त्यांना मी एवढेच सांगते की माझे वडील गेले काही दिवसांपासून खूप आजारी आहेत. यावेळी त्यांना माझी खूप गरज होती त्यामुळे मी मालिका सोडण्याचा निर्णय घेतला. कधीकधी तुम्ही तुमच्या कामापेक्षा कुटुंबाला प्राधान्य देणे गरजेचे असते. आई, वडील, मुलं, नवरा या आपल्या माणसांसाठी तुम्हाला असे निर्णय घ्यावे लागतात. मी माझ्या वडिलांची काळजी घेण्यासाठी मालिकेतून काढता पाय घेतला आहे. हा निर्णय घेतल्यानंतर मला दिग्दर्शक, निर्माते सर्वांनी खूप सहकार्य केले. माझ्यावर विश्वास दाखवत मालिकेत अक्षराला घडविण्यासाठी खूप जणांनी मदत केली त्या सर्वांचे मनापासून आभार मानते. प्रेक्षकांनीही या मालिकेवर खूप प्रेम दाखवले, असेच प्रेम तुम्ही पुढेही दाखवाल अशी आशा आहे. असे म्हणत अमिताने मालिकेतून बाहेर पडण्याचे कारण समोर आणले आहे.