मराठीतले दर्दी रसिक गेले कुठे?.. चित्रपट चांगला असूनही प्रेक्षकांना रिलीज झालेला माहीतच नाही

​मराठी चित्रपट चांगले बनत नाहीत अशी ओरड प्रेक्षकांची असते त्यामुळे मराठी चित्रपटांऐवजी लोक हिंदी आणि टॉलिवूडच्या चित्रपटांना गर्दी करत असतात. असे एक सर्वसाधारण मत देणारे प्रेक्षक आता चित्रपट चांगला असूनही केवळ पाचच जण त्याला हजेरी लावत असतील तर याचे कारण शोधणे गरजेचे आहे. अनेकदा मराठी चित्रपटांना स्क्रीन दिल्या जात नाहीत तेव्हा मनसे सैनिक या मराठी चित्र​पटांच्या मदतीला धावून जात असतात. पण आता स्वतः अमेय खोपकर यांनाच हा अनुभव आलेला आहे.​ काल ६ ऑक्टोबर रोजी ​आत्मपॅम्प्लेट हा मराठी चित्रपट प्रदर्शित झाला.

पण अख्ख्या थिएटरमध्ये केवळ पाचच जण असल्याने मराठी दर्दी रसिक गेले कुठे? असा प्रश्न अमेय खोपकर यांना पडला आहे. परेश मोकाशी सारखा उत्तम लेखक जेव्हा अशा सामाजिक चित्रपटांचे लिखाण करतो आणि आशिष बेंडे सारखा दिग्दर्शक त्याला लाभतो तेव्हा आत्मपॅम्प्लेट सारखा चित्रपट तयार होतो. हा चित्रपट तुम्हाला हसून लोटपोट तर करतोच पण यातून तुम्हाला एक सामाजिक संदेशही दिला जातो. तेव्हा असे चित्रपट पाहण्यासाठी नक्कीच गर्दी करावी असे मत अमेय खोपकर यांनी व्यक्त केलं आहे. हा चित्रपट पाहून आल्यानंतर हेमंत ढोमे, हेमांगी कवी, गिरीजा ओक, नीना कुळकर्णी यांनी चित्रपटाचे खूप कौतुक केले आहे. हा चित्रपट तुम्हाला शेवटपर्यंत थिएटरमध्ये एका जागेवर खिळवून ठेवतो यातच या चित्रपटाचे खरे यश दडलेले आहे.

पण असे चित्रपट पाहायला प्रेक्षकच नाहीत अशी परिस्थिती समोर दिसत आहे. मुळात आत्मपॅम्प्लेट या नावाचा चित्रपट आहे हेच प्रेक्षकांना माहीत नाहीये. त्यामुळे चित्रपट कधी रिलीज झाला हेही प्रेक्षकांना ठाऊक नाहीये. खरं तर बॉलिवूड, टॉलिवूडच्या चित्रपटांचे प्रमोशन दणक्यात होत असते त्यासाठी खूप खर्च करण्यात येतो. पण सर्वसामान्यांचा चित्रपट प्रमोशनच्या कारणास्तव मागे पडतो. आत्मपॅम्प्लेट या नावाचा चित्रपट बनतोय याची कल्पना प्रेक्षकांनाही नव्हती. त्याचमुळे चित्रपटाचे कथानक चांगले असूनही असे चित्रपट पाहण्यासाठी खूप कमी येतात. निर्मात्यांनी अशा गोष्टींचा विचार करणे गरजेचे आहे. सोशल मीडियाच्या माध्यमातून अशा गोष्टींना प्रसिद्धी दिली जाते मात्र अशा गोष्टी व्हायरल होत नाहीत.

किंवा त्या गोष्टींवर चर्चा केली जात नाही म्हणूनच अशा चित्रपटांना प्रेक्षकांकडून प्रतिसाद मिळत नाही. शाळेत असताना आपण जे अनुभव घेतले आहेत तेच मुद्दे या चित्रपटात मांडण्याचा प्रयत्न करण्यात आला आहे. एक विनोदी, सामाजिक संदेश देणारा कौटुंबिक चित्रपट पाहण्याची ईच्छा असेल त्याने हा चित्रपट आवर्जून पाहावा, चित्रपट पाहिल्यानंतर त्यांची निराशा नक्कीच होणार नाही हे चित्रपट पाहिल्यानंतर तुम्हाला नक्कीच ते जाणवेल. पण त्यासाठी तुम्ही अशा चित्रपटांना प्रतिसाद देणे आवश्यक आहे.