सचिन तेंडुलकरने बाईपण भारी देवा पाहिला.. व्हिडीओ कॉलकरून या अभिनेत्रीचे केले कौतुक

बाईपण भारी देवा हा चित्रपट ह्या वर्षीचा यशस्वी मराठी चित्रपट ठरला आहे. गेल्या ३६ दिवसात चित्रपटाने प्रेक्षकांचा भरभरून प्रतिसाद मिळवला आहे. त्याचमुळे हा चित्रपट ७३.५२ कोटींचा गल्ला बॉक्सऑफिसवर जमवण्यात यशस्वी ठरला आहे. आजही महिलांचे ग्रुपच्या ग्रुप हा चित्रपट पाहायला गर्दी करत आहेत. अशातच आता क्रिकेटचा देव समजल्या जाणाऱ्या सचिन तेंडुलकरनेही सपत्नीक बाईपण भारी देवाच्या शोला हजेरी लावली. सचिन तेंडुलकर पत्नी अंजली सोबत हा चित्रपट पाहण्यासाठी हजेरी लावतो ते पाहून अनेकांना त्याचं कुतूहल वाटलं. केदार शिंदेने सचिन आणि अंजली तेंडुलकर सोबतचा एक व्हिडिओ शेअर केला आहे.

चित्रपट पाहिल्यानंतर सचिन तेंडुलकर केदारचे विशेष कौतुक करतो. या चित्रपटातील अभिनेत्री दीपा परब शूटिंगमध्ये व्यस्त होती. मात्र तरीही व्हिडीओ कॉल करून सचिनने दीपा परबच्या अभिनयाचं मोठं कौतुक केलं. दीपा परबला सचिन तेंडुलकर आवडतो. तो माझा पहिला सेलिब्रिटी क्रश आहे असे दीपा परबने एका मुलाखतीत म्हटले होते. सचिनला कधितरी भेटण्याची इच्छा तिने व्यक्त केली होती. मात्र आज खुद्द सचिन तेंडुलकरच्या तोंडुनच आपल्या अभिनयाचं कौतुक होतंय हे पाहून दीपा भारावून गेली होती. केदार शिंदेने सचिन आणि दिपाची ही व्हिडीओ कॉल द्वारे भेट घडवून आणली. दीपा या अविस्मरणीय क्षणाबद्दल म्हणते कि, सचिन, द सचिन तेंडुलकर. लाखो करोडो चाहते आहेत त्यांचे, मी देखील त्यांच्यापैकीच एक. त्यांची भेट होणं ही माझ्यासाठी खरंच एक फॅन मोमेंट आहे.

बाई पण भारी देवा चित्रपटाने खरंच आम्हाला भरपूर काही दिलंय पण सचिन तेंडुलकर येऊन चित्रपट बघतील. त्यांना तो आवडेल आणि त्याचं ते इतकं कौतुक देखील करतील याचा आम्ही कोणीही स्वप्नांत देखील विचार नव्हता केला. पण, YES It’s Fact. शब्दांत न मांडता येणारा पण आयुष्यभरासाठी मनावर कोरला गेलेला हा एक क्षण. मालिकेच्या शूटिंग मध्ये व्यस्त असल्यामुळे मला प्रत्यक्ष स्क्रीनिंगला जाता आले नाही. ज्या व्यक्तीला आयुष्यात एकदा तरी भेटायची इच्छा होती त्याला भेटण्याची संधी समोरून चालून आलेली असता मी त्या संधीला मुकले असं वाटत असतानाच मला व्हिडीओ कॉल येतो. आणि प्रत्यक्ष सचिन तेंडुलकर यांच्याशी संवाद साधला जातो. आम्हा सर्व जणींचा अभिनय, चित्रपट त्यांना आवडला हे ऐकून खूप छान वाटलं. अजूनही हे सर्व काही स्वप्नवतचं आहे.

THANK YOU निखिल साने आणि अजित भुरे, आयुष्यभर लक्षात राहणाऱ्या ह्या एका अविस्मरणीय फोन साठी. यावेळी सचिनने प्रत्यक्षात भेट करू असेही आश्वासन दिले. त्यामुळे दीपाला तिच्या क्रशला भेटण्यास नक्कीच उत्सुक असणार आहे. बाईपण भारी देवा या चित्रपटाने नुकताच वेड चित्रपटाचा रेकॉर्ड मोडला आहे. त्यामुळे अजूनही बाईपण भारी देवा हा चित्रपट अधिकची कमाई करेल असा विश्वास आहे. चित्रपटाचे हे यश खरं तर दिग्दर्शक, लेखक आणि कलाकारांचे आहे. आज फ्रेंडशिप डे च्या निमित्ताने या चित्रपटातील कलाकारांनी एक छोटीशी पार्टी साजरी केली होती. हे त्यांच्यात जुळून आलेलं बॉंडिंग चित्रपटातूनही जुळल्याने चित्रपट अधिकच उठावदार बनला हेच या चित्रपटाचे यश म्हणावे लागेल.