भाग्य दिले तू मला फेम विवेकने घेतली एवढ्या लाखांची पहिली गाडी..

भाग्य दिले तू मला या कलर्स मराठीवरील मालिकेत लवकरच राज आणि कावेरीच्या लग्नाचा बार उडणार आहे. गेल्या अनेक दिवसांपासून मालिकेत या दोघांचे लग्न कधी होणार याची उत्सुकता  प्रेक्षकांना लागून होती. मात्र आता साखरपुड्या नंतर हे दोघेही आता २६ फेब्रुवारी रोजी विवाहबद्ध होत आहेत. त्यामुळे २० तारखेपासून मालिकेत त्यांच्या लग्नाच्या पूर्व विधींना सुरुवात होत आहे. त्यामुळे हा लग्नसोहळा सप्ताह पाहायला प्रेक्षकांनाही नक्कीच आवडेल. एकीकडे मालिकेतला सोहळा साजरा करत असतानाच खऱ्या आयुष्यात विवेकने आपली पहिली वहिली कार खरेदी करून हा आनंद द्विगुणित केलेला आहे.

काल व्हॅलेंटाईन डे चे औचित्य साधून विवेकने स्वतःच्या कमाईतून पहिली वहिली कार खरेदी केली आहे. ही गाडी खरेदी करताना विवेक त्याच्या आईवडिलांना घेऊन आला होता. Kia ब्रँडची Seltos ही गाडी त्याने खरेदी केली आहे. या गाडीची किंमत १५ ते १८ लाखांच्या घरात आहे. मालिकेतून उत्तम मानधन मिळत असल्याने विवेकने स्वतःची गाडी असावी असा विचार केला होता. भाग्य दिले तू मला या मालिकेत राजवर्धनची भूमिका विवेक सांगळे याने साकारली आहे. या मालिकेमुळे विवेकला चांगली प्रसिद्धी मिळत आहे. तन्वी मुंडले आणि विवेक सांगळे यांच्या जुळून आलेल्या केमिस्ट्री वर प्रेक्षकांनी पसंती दर्शवली आहे. आपल्या आयुष्यातली पहिली गाडी आणि पहिलं घर खरेदी करण्याचा आनंदच वेगळा असतो.

असाच काहीसा अनुभव विवेकने त्याच्या आयुष्यात घेतला आहे. देवयानी या मालिकेतून विवेकने अभिनय क्षेत्रात पदार्पण केले होते. कीर्ती डुंगुरसी कॉलेज मधून त्याने बीकॉमची पदवी मिळवली. अभिनयाची आवड होतीच, त्यामुळे रंगभूमीशी तो जोडला गेला. देवयानी मालिकेत त्याने साकारलेली एक्का सावंत बाजीची भूमिका खूपच गाजली होती. लव्ह लग्न लोचा, आम्ही दोघी, आई माझी काळूबाई, व्हाय सो गंभीर, चक्रव्ह्यूव अशा मालिका, नाटक आणि चित्रपटातून विवेक महत्वपूर्ण भूमिकेत झळकला आहे. मात्र या प्रवासात त्याला खरी लोकप्रियता मिळाली ती भाग्य दिले तू मला या मालिकेतून. राज आणि कावेरी यांचे रिल्स प्रेक्षकांना नेहमीच आवडतात, यामधून त्यांची सेटवरची धमाल मस्ती प्रेक्षकांनाही अनुभवायला मिळते.