मुलगी झाली हो.. मराठी सृष्टीतील प्रसिद्ध अभिनेत्याला कन्यारत्न प्राप्ती..

हिंदी सेलिब्रिटी विश्वातील प्रसिद्ध अभिनेत्री आलिया भट हिला काही दिवसांपूर्वीच कन्यारत्न प्राप्ती झालेली पहायला मिळाली. मुलीच्या आगमनाने कपूर कुटुंबिय भलतेच खुश झालेले दिसले. यांच्या जोडीलाच बिपाशा बसुने देखील मुलीला जन्म दिला. त्यामुळे हिंदी सृष्टीत सध्या सगळीकडुन त्यांच्यावर कौतुकाचा वर्षाव होताना दिसत आहे. एकीकडे ही धामधूम साजरी होत असतानाच मराठी सेलिब्रिटींनी देखील बाळाच्या आगमनाची चाहूल दिलेली पाहायला मिळाली. दिवंगत अभिनेते विजय चव्हाण यांचा मुलगा वरद याला देखील कन्यारत्न प्राप्ती झाली आहे. काही दिवसांपूर्वीच वरदने लवकरच बाबा होणार असल्याची बातमी जाहीर केली होती.

मुलगी झाली हो, असे म्हणत वरदने काही वेळापूर्वीच ही आनंदाची बातमी आता जाहीर केली आहे. त्याच्या या गोड बातमीने संपूर्ण मराठी सेलिब्रिटींनी त्याच्यावर अभिनंदनाचा वर्षाव केला आहे. वरद हा विजय चव्हाण यांचा मुलगा आहे हे बहुतेकांना माहीत नव्हते. कारण आपल्या मुलाने आपल्या नावाचा वापर करू नये अशी त्यांची शिकवण होती. त्यानंतर वरदने स्वतःच्या बळावर मराठी सृष्टीत स्थान निर्माण केले. लेक माझी लाडकी, ललित २०५, १०० डेज, अजूनही चांद रात आहे, खो खो, ऑन ड्युटी २४ तास, श्रीमंत दामोदरपंत, धनगरवाडा अशा चित्रपट आणि मालिकांमधून वरद झळकला आहे. बारा वर्षांच्या अभिनय क्षेत्राच्या प्रवासात वरदला आई मायेचं कवच या मालिकेनिमित्त उत्कृष्ट अभिनयाचे पारितोषिक मिळाले त्यावेळी आज बाबा असायला हवे होते असे तो आवर्जून म्हणताना दिसला.

२४ ऑगस्ट २०१८ रोजी विजय चव्हाण यांचे प्रदीर्घ आजाराने निधन झाले. यावेळी आपल्या मुलाचे लग्न पाहाण्याची विजय चव्हाण यांची शेवटची इच्छा अपुरी राहिली होती. विजय चव्हाण यांची प्रकृती खालावत चालल्याने आपल्या मुलाचे लग्न आपल्याला पाहाता येणार नाही याची जाणीव त्यांना मृत्यूपूर्वी झाली होती. त्यांच्या निधना पश्चात वरदचे लग्न प्रज्ञा गुरवशी झाले होते. प्रज्ञा ही कॉर्पोरेट क्षेत्राशी संबंधित आहे. काही दिवसांपूर्वीच या दोघांनी आईबाबा होणार असल्याची बातमी जाहीर केली होती. आज त्यांना कन्यारत्न प्राप्ती झाल्याने चव्हाण कुटुंबात आनंदाचे वातावरण पाहायला मिळत आहे. आदिनाथ कोठारे, पल्लवी पाटील, आशुतोष कुलकर्णी, ऐश्वर्या नारकर, पंकज विष्णू या सेलिब्रिटींनी वरद आणि प्रज्ञाला कन्यारत्न प्राप्ती झाल्याबद्दल अभिनंदन केलेले आहे.