तुझ्या माझ्या संसाराला आणि काय हवं मालिकेत सुंदर अभिनेत्रीची एन्ट्री

झी मराठी वाहिनीवरील तुझ्या माझ्या संसाराला आणि काय हवं या मालिकेत नव्या पात्राची एन्ट्री होणार आहे. या नव्या एंट्रीमुळे मालिकेला रंजक वळण मिळणार आहे. मालिकेला असे ट्विस्ट दिल्यामुळे मूळ कथानकाला फाटे देता येतात. त्यामुळे मालिकेची लांबी हवी तशी वाढवली जाते. रेवा दीक्षित हे पात्र मालिकेत काय घोळ घालणार याची उत्सुकता आहे कारण नायिकेची आई अगोदरच देशमुखांच्या घरात कुरघोड्या करताना दिसते आहे. आदिती आणि सिध्दार्थच्या दुरावलेल्या नात्यात ही रेवा आता अधिक भर घालणार की त्यांचे नाते जुळवण्याचा प्रयत्न करणार हे मालिकेतून पाहावे लागेल. तूर्तास रेवा दिक्षितची भूमिका कोणती अभिनेत्री साकारणार हे पाहुयात.

तुझ्या माझ्या संसाराला आणि काय हवं या मालिकेला भली मोठी स्टार कास्ट लाभली आहे. एकत्र कुटुंबातील सुख दुःख नेमकी कशी असतात त्याची जाणीव या मालिकेतून करून देण्यात येत आहे. त्यामुळे या मालिकेचा एक स्वतंत्र चाहता वर्ग तयार झाला आहे. रेवा दीक्षित आता मालिकेतून देशमुखांच्या कारखान्यात भागीदारी करणार आहे, ही भूमिका अभिनेत्री वीणा जगताप साकारणार आहे. कलर्स मराठीवरील बिग बॉसच्या दुसऱ्या सिजनमध्ये वीणा जगतापने सहभाग दर्शवला होता. या शोमधून वीणा प्रेक्षकांच्या घराघरात पोहोचली. ये रिश्ता क्या केहलाता है या हिंदी मालिकेतून विणाने अभिनय क्षेत्रात पदार्पण केले होते. राधा प्रेम रंगी रंगली यात विणाला लोकप्रियता मिळाली होती. बिग बॉसच्या सिझन २ मध्ये शिव ठाकरे सोबत तिचे नाव जोडले होते.

त्याच्या नावाचा एक टॅटु तिने हातावर गोंदवून घेतला होता. मात्र शो मधून बाहेर पडल्यानंतर या दोघांचे ब्रेकअप झाल्याची चर्चा पाहायला मिळाली. आई माझी काळूबाई ही मालिका प्राजक्ता गायकवाडने अर्ध्यावर सोडल्यावर वीणा जगतापची वर्णी लागली होती. परंतु सततच्या प्रवासामुळे आणि प्रकृती खालावल्याने विणाने ही मालिका सोडण्याचा निर्णय घेतला होता. या मालिकेनंतर वीणा जगताप एका दमदार भूमिकेतून पुन्हा एकदा प्रेक्षकांच्या भेटीला येत आहे. तुझ्या माझ्या संसाराला आणि काय हवं या मालिकेत ती रेवा दीक्षित या पाहुण्या कलाकाराची भूमिका साकारणार आहे. ही रेवा सकारात्मक भूमिका साकारणार की विरोधी भूमिका साकारणार हे येत्या काही भागातच स्पष्ट होईल तूर्तास या नव्या भूमिकेसाठी वीणा जगताप हिचे अभिनंदन!