हृताचा नवा चित्रपट.. दगडूसोबत दिसणार डॅशिंग भूमिकेत

फुलपाखरू, मन उडू उडू झालं या मालिकेमुळे हृता दुर्गुळे प्रेक्षकांच्या घराघरात पोहोचली आहे. या मालिकांमधून हृताने आजवर सोज्वळ भूमिका साकारलेल्या पाहायला मिळाल्या आहेत. मात्र आता ही साधी सुधी हृता डॅशिंग भूमिकेतून प्रेक्षकांच्या भेटीला येत आहे. हृताची मुख्य भूमिका असलेला टाईमपास ३ हा नवा चित्रपट लवकरच प्रेक्षकांच्या भेटीस येत आहे. ‘आपण पालवी दिनकर पाटील. पालवी फुटत नाय फोडते, आपल्या दोस्ताला जो नडेल त्याचा मार्बल फोडेल.’ असे म्हणत हृता टाईमपास ३ या आगामी चित्रपटाचा हृता उपद्रवी तरुणांची धुलाई करत चित्रपटात धमाल करताना दिसणार आहे. रवी जाधव यांच्या टाईमपास या चित्रपटाने तुफान लोकप्रियता मिळवली होती.

टाईमपास २ या चित्रपटानंतर त्यांनी पुढील सिक्वल टाईमपास ३ करण्याचा निर्णय घेतला. केतकी माटेगावकर, प्रिया बापट यांच्यानंतर या आगामी चित्रपटासाठी ते तितक्याच तगड्या नायिकेच्या शोधात होते. मध्यंतरी या चित्रपटासाठी हृता दुर्गुळेची निवड करण्यात आली अशी चर्चा रंगलेली पाहायला मिळाली होती. त्यानंतर आता हृताचा या चित्रपटातला हटके लूक प्रेक्षकांसमोर आलेला पाहायला मिळणार आहे. हृता दुर्गुळे सोबत या चित्रपटात दगडूची भूमिका गाजवणारा प्रथमेश परब महत्वाच्या भूमिकेत दिसणार आहे. वैभव मांगले देखील या चित्रपटात नेहमीप्रमाणेच नायिकेच्या वडिलांची भूमिका साकारणार आहेत. त्यामुळे या चित्रपटाची उत्सुकता आता शिगेला पोहोचली आहे.

टाईमपास हा चित्रपट केतकी माटेगावकर आणि प्रथमेश परब यांनी आपल्या अभिनयाने गाजवला होता. यातील ही पोली साजूक तुपातली हे गाणं सुपरडुपर हिट झालं होतं. चित्रपटाच्या भरघोस यशानंतर रवी जाधव टाईमपास २ हा चित्रपट घेऊन आले. या चित्रपटातून दगडू आणि प्राजूची लव्हस्टोरी पुन्हा एकदा अनुभवायला मिळाली. प्रिया बापट आणि प्रियदर्शन जाधव यांनी रंगवलेले दगडू प्राजु प्रेक्षकांची दाद मिळवून गेले. प्रथमेश परबचा भोळेपणा आणि हृताचा डॅशिंग अंदाज या आगामी चित्रपटात पाहायला मिळणार असल्याने हा कधी प्रदर्शित होणार याचीच प्रेक्षक वाट पाहत आहेत. दरम्यान हृता दुर्गुळे अनन्या या आगामी चित्रपटात एका असाधारण तरुणीची भूमिका साकारणार आहे. त्यामुळे हृताचे हे दोन्ही चित्रपट तिच्यासाठी खूपच खास ठरणार आहेत.