‘सायली अगं किती मंद आहेस’.. ठरलं तर मग मालिकेच्या सीनवर प्रेक्षकांच्या संतापजनक प्रतिक्रिया

स्टार प्रवाहवरील ठरलं तर मग या मालिकेवर प्रेक्षकांनी प्रचंड प्रेम दाखवलं आहे. त्याचमुळे सलग ८ आठवडयाहून अधिक काळ ही मालिका टीआरपीच्या स्पर्धेत नंबर एकवर स्थान टिकवून आहे. आई कुठे काय करते आणि रंग माझा वेगळा मालिकेच्या रेसमध्ये ठरलं तर मग ही मालिका अव्वल स्थानावर येऊन पोहोचली आहे. मात्र काही कालावधीनंतर लेखकाने कथानकात पाणी वाढवून तिचा चोथा करू नये अशी अपेक्षा व्यक्त केली जात आहे. सायली आणि अर्जुनच्या खोट्या लग्नाच्या लपवा छपवीनंतर मालिकेत झालेला गोंधळ पाहून प्रेक्षक ही मालिका पाहण्यासाठी खूपच उत्साही दिसत आहेत.

मात्र हे खोटं लग्न लपवण्यासाठी सायलीला पूर्णा आजीच्या रोषाला सामोरे जावे लागत आहे. आपल्या नातवाला सायलीने फसवलं म्हणून पूर्णा आजी तिच्यावर चिडून आहेत. त्यात भर म्हणून की काय प्रियाच्याही कटकारस्थानाला तिला बळी पडावं लागत आहे. सायलीने अर्जुन सोबत लग्न केल्यामुळे प्रिया तिच्यावर चिडलेली असते. पूर्णा आजी समोर दरवेळी ती सायलीला अडचणीत आणण्याचा प्रयत्न करते. आता तर प्रियाने सायलीला त्रास देण्यासाठी कहरच केलेला आहे. सायलीच्या खोलीत जाऊन ती स्वतःलाच मारत सुटते. भिंतीवर डोकं आपटून घेते. जणू सायलीच तिला मारतिये हे तिला सगळ्यांना भासवायचे असते. हा सिन पाहून मात्र प्रेक्षक संतापजनक प्रतिक्रिया देत आहेत. जेव्हा प्रिया हे सगळं भासवण्यासाठी सायलीच्या खोलीला आतून कडी लावते.

सायली अगदी मंद असल्यासारखी हे सगळं पाहत बसते. प्रिया आपल्याला त्रास देण्यासाठी हे करतीये याची जाणीव असतानाही ती प्रियाला केवळ समजावण्याचा प्रयत्न करते. इथे मात्र प्रेक्षक सायलीच्या या मंदपणावर नाराज आहेत. सायलीने सरळ दार उघडून बाहेर पडावे म्हणजे प्रियाचे कारस्थान सगळ्यांसमोर येईल असे प्रेक्षक तिला सांगण्याचा प्रयत्न करत आहेत. अर्थात या गोष्टी प्रेक्षकांच्या हातात मुळीच नसल्याने नाईलाजास्तव लेखकाच्या विचारांची कीव करावीशी वाटते. मालिकेचा हा सिन पाहून प्रेक्षक प्रिया विरोधात उलट सुलट प्रतिक्रिया देत आहेत. तर सायलीला देखील सल्ले दिले जात आहेत. मालिकेचे कथानक रिअल समजूनच प्रेक्षक अशी प्रतिक्रिया देत असतात. तर विरोधी पात्राला प्रेक्षक दिसताक्षणी धारेवर धरतात.

अनेकदा हे विरोधी पात्र साकारणारे सेलिब्रिटी जर सार्वजनिक ठिकाणी दिसले तर तिथेच प्रेक्षकांकडून त्यांची कानउघडणी केली जाते. अर्थात ही त्या कलाकाराला मिळालेली त्याच्या अभिनयाची एक पावतीच असते. पण मालिकेचे कथानक पुढे जाऊन भरकटले जाऊ नये अशी भाबडी अपेक्षा हे प्रेक्षक व्यक्त करत आहेत. आतापर्यंत मालिकेचे कथानक सुरळीत सुरू आहे. सायली आणि अर्जुन या दोघांची जुळून आलेली केमिस्ट्री प्रेक्षकांना विशेष आवडली आहे. या दोघांनी लवकरच खरं लग्न करावं अशी प्रेक्षकांची ईच्छा आहे.